Avqustun 16-da Bakının Xətai rayonunda Qarabağ müharibələri şəhidləri Rəfiyev Ülvi Rəfail oğlu və Cəfərov Zaur Fuad oğlunun xatirəsinə həsr olunmuş lövhənin açılışı olub.

AZƏRTAC xəbər verir ki, əvvəlcə şəhidlərimizin əziz xatirəsi bir dəqiqəlik sükutla yad edilib, Azərbaycanın Dövlət Himni səsləndirilib.

Tədbirdə Xətai Rayon İcra Hakimiyyətinin şöbə müdiri Pənah İmanov, “İki Sahil” qəzetinin baş redaktoru Vüqar Rəhimzadə, Məşədi Dadaş məscidinin axundu, din xadimi Hacı Şahin və başqaları çıxıb ediblər.

Çıxışlarda Prezident, Müzəffər Ali Baş Komandan İlham Əliyevin rəhbərliyi ilə qazanılan Qələbədə şəhidlərimizin şücaətindən danışılıb, Vətən qarşısında öz borclarını ləyaqətlə yerinə yetirənlərin xatirəsinin xalqımız tərəfindən daim əziz tutulacağı söylənilib.

Hər iki şəhidin ailə üzvləri, müəllimləri, yaxınları çıxış edərək onlarla bağlı xatirələrini bölüşüb, Vətən uğrunda canından keçən insanlara göstərilən diqqət və qayğıya görə Prezident İlham Əliyevə, birinci xanım Mehriban Əliyevaya, eləcə də rayon ictimaiyyətinə minnətdarlıqlarını bildiriblər.

Sonra məktəblilər tərəfindən Vətənə, Ordumuza, şəhidlərimizə həsr olunan şeirlər söylənilib.

Sonda şəhidlərin xatirə lövhəsinin qarşısına tər güllər düzülüb.

Qeyd edək ki, bu gün 25 yaşı tamam olan şəhid Ülvi Rəfiyev 1996-cı il avqustun 16-da Ordubad rayonunda anadan olub. Vətən müharibəsinin iştirakçısı Ü.Rəfiyev 2020-ci il oktyabrın 15-də Xocavənd uğrunda gedən döyüşlərdə şəhid olub. Rəfiyev Ülvi Rəfail oğlu Prezident İlham Əliyevin sərəncamları ilə ölümündən sonra “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif olunub.

Birinci Qarabağ müharibəsi şəhidi Zaur Fərəcov isə 1974-cü il sentyabrın 2-də Bakıda dünyaya göz açıb. O, 1994-cü il yanvarın 28-də Xocavənd uğrunda gedən döyüşlərdə itkin düşüb. 1999-cu il sentyabrın 22-də Z.Cəfərova şəhid statusu verilib.