Azərbaycanın işğaldan azad olunmuş ərazilərində səfərdə olan bir qrup xarici jurnalist sentyabrın 17-də Füzulidə erməni vandalizminin şahidi olub.

AZƏRTAC xəbər verir ki, Prezidentin Qarabağ iqtisadi rayonuna daxil olan işğaldan azad olunmuş ərazilərdəki Xüsusi Nümayəndəliyinin əməkdaşı Araz İmanov jurnalistlərə erməni vandalizmi barədə danışıb.

Jurnalistlər Füzuli şəhərində Ermənistanın törətdiyi müharibə cinayətlərinin ağır nəticələri ilə tanış olublar. Onlar burada ermənilərin 27 il ərzində törətdikləri vəhşilikləri, vandalizmi öz gözləri ilə görüblər.

Məlumat verilib ki, ermənilər Füzulidə yaşayış məntəqələrini, qəbiristanlıqları, tarixi, mədəni abidələri vəhşicəsinə dağıdıblar.

İşğalçılar Azərbaycanın ən inkişaf etmiş şəhərlərindən olan Füzulidə bir dənə də olsun salamat bina qoymayıblar. Hər şey dağıdılıb, talan edilib. Ermənilər rayondakı tarixi, mədəni və memarlıq abidələrini tamamilə məhv ediblər.

Diqqətə çatdırılıb ki, Qarabağda erməni vandalizminə məruz qalan yaşayış məntəqələrindən biri də Füzuli rayonunun Merdinli kəndidir. Köndələnçayın sahilində, düzənlikdə yerləşən bu kənddə işğala qədər heyvandarlıq, taxılçılıq və üzümçülük inkişaf etmişdi. 1993-cü ildə ermənilər tərəfindən işğal edilərək dağıdılan kənd Azərbaycan Ordusunun həyata keçirdiyi əks-həmlə əməliyyatları zamanı 2020-ci il noyabrın 9-da azad olunub.

Erməni vandalları 27 il ərzində kəndi talayıb, onu demək olar yer üzündən siliblər. Bütün evlər, sosial obyektlər dağıdılıb, təsərrüfatlar məhv edilib. Kənd qəbiristanlığı da erməni vandalizminə məruz qalıb - məzarlar dağıdılıb, məzar daşları uçurulub, cəsədlər qazılaraq çıxarılıb.

Sonda qonaqlar Füzuli rayonunun Qaraxanbəyli kəndində erməni vəhşiliyinə məruz qalan qəbiristanlıqla tanış olublar.

Bununla da xarici jurnalistlərin Azərbaycanın işğaldan azad olunmuş rayonlarına ikigünlük səfəri başa çatıb.