İndiyə kimi buraxılış və qəbul imtahanlarında 143 mindən artıq şagird (abituriyent) iştirak edib.

AZƏRTAC xəbər verir ki, bunu iyulun 20-də Azərbaycan Respublikası Nazirlər Kabineti yanında Operativ Qərargahda keçirilən brifinqdə Dövlət İmtahan Mərkəzinin (DİM) Mətbuatla iş sektorunun müdiri Xanlar Xanlarzadə deyib.

O bildirib ki, pandemiya şəraitində imtahanların keçirilməsi ilə bağlı müvafiq qurumlarla birgə təlimat hazırlanıb. Keçirdiyimiz və keçirəcəyimiz imtahanlar həmin təlimat əsasında təşkil olunub. İmtahanlar lokallaşdırılıb. Əvvəllər imtahanlar daha çox şəhər mərkəzlərində təşkil edilirdi. Kütləviliyin azaldılması məqsədilə bütün şəhərlərdə və rayonlarda bu imtahanları keçirmişik. Bu işdə bizə Təhsil Nazirliyi dəstək göstərib.