Oktyabrın 21-də Nizami Kino Mərkəzində Xalq rəssamı Kamil Əliyevə həsr olunmuş “Kamillik” sənədli filminin təqdimatı olub.

AZƏRTAC xəbər verir ki, film Prezident İlham Əliyevin Xalq rəssamı Kamil Əliyevin 100 illiyi ilə bağlı imzaladığı müvafiq Sərəncama əsasən çəkilib.

“Xəzər” televiziyasının rəhbəri, Xalq artisti Murad Dadaşov bildirib ki, Kamil Əliyevin əziz xatirəsi hər kəsin ürəyində yaşayır: “Kamil Əliyev fərqli bir insan olub. Mənim də vaxtilə onunla ünsiyyətim var idi. Yaddaşımda səmimi, mehriban insan kimi iz qoyub. Kamil Əliyevin həyatla mübarizəsi hələ onun uşaqlıq dövründən başlayıb. Kamil Əliyev xalçaçılıq sənətinə xüsusi rənglər gətirmiş, xalça sənayesinin qurulmasına töhfə vermiş bir şəxsiyyət kimi yadda qalıb”, - deyə M.Dadaşov qeyd edib.

Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani bildirib ki, hərbçinin səhnədə çıxış etməsi təsadüfi deyil: “Kamil Əliyev İkinci Dünya müharibəsində iştirak etmiş peşəkar zabit idi, onlarla döyüş medalları ilə təltif olunmuşdu. O, 1936-cı ildə rəssamlıq məktəbini bitirdikdən sonra özünü xalçaçılıq sənətinə həsr etdi. Kamil Əliyevi tanımaq üçün onun xalçalarının ilmələrini bir-bir nəzərdən keçirmək lazımdır. Kamil müəllimin xalçasında həm zəfəri, həm də xalqımızın tarixini görmək olar”.

Filmin ssenari müəllifi Nadir Bədəlov bildirib ki, filmi ərsəyə gətirməkdən ötrü Kamil Əliyevi yaxından tanıyan, onun sənətinə bələd olan insanlarla görüşüb, maraqlı məlumatlar toplayıb. Diqqətə çatdırıb ki, Kamil Əliyevi hər bir azərbaycanlı tanıyır, onun xalçalarının sehrini bilir. “Biz bu filmi Kamil Əliyevi şəxsiyyət kimi tanıtmaq üçün çəkdik, şəxsiyyətlə sənətkarı bir simada birləşdirməyə çalışdıq”, - deyə o qeyd edib.

Adətən ssenariləri tez bitirməyə çalışdığını bildirən Nadir Bədəlov deyib ki, Kamil Əliyevin ömrü bir əsər olduğu üçün onun həyatını tam araşdırmaq tələb olunurdu. “Kamillik” filminə baxan hər kəs böyük sənətkarın olduqca maraqlı bir tərcümeyi-hala sahib olduğunu görəcək.

Qeyd olunub ki, Kamil Əliyev bütün ömrünü xalqımızın mədəniyyət tarixində müstəsna yer tutan xalçaçılıq sənətinin parlaq ənənələrinin yaşadılmasına və inkişafına sərf edib. Fitri istedada malik rəssam milli naxış elementlərindən uğurla bəhrələnərək rəngarəng dekorativ motivlər yaradıb, Azərbaycan xalçaçılığı və tətbiqi sənətini daim yeni ornamentlərlə zənginləşdirib. Kompozisiya özünəməxsusluğu, rəng ahəngdarlığı və süjet əlvanlığı rəssamın Azərbaycan xalçaçılıq məktəblərinin xüsusiyyətlərini özündə cəmləşdirən çeşnilər əsasında toxunmuş xalçalarının başlıca səciyyəvi cəhətləridir. Onun qüdrətli söz dühalarına, görkəmli siyasi xadimlərə həsr olunan və yüksək professionallığı, bədii-estetik mükəmməlliyi ilə seçilən portret-xalçaları incəsənətimizin qızıl fondunun qiymətli nümunələrindəndir. Kamil Əliyevin əsərləri dünyanın mötəbər muzey, qalereya və sərgi salonlarında dəfələrlə nümayiş etdirilib. Böyük sənətkar xalçaçı kadrların hazırlanması işinə mühüm töhfələr verib.

Qeyd edək ki, filmin rejissoru İlham Əliyev, ssenari müəllifi Nadir Bədəlovdur