Bu gün Azərbaycan muğam ifaçılığı sənətinin görkəmli nümayəndəsi, Xalq artisti Sara Qədimovanın anadan olmasının 100-ci ildönümü tamam olur.

AZƏRTAC xəbər verir ki, bu münasibətlə tanınmış incəsənət və mədəniyyət xadimləri, ictimaiyyətin nümayəndələri Fəxri xiyabana gələrək Sara Qədimovanın məzarı önünə əklil qoyub, tər çiçəklər düzüblər.

Anım mərasimində Mədəniyyət Nazirliyinin İncəsənət və qeyri-maddi mədəni irs şöbəsinin müdiri Fərəh Acalova, Xalq Artisti, professor Ağaverdi Paşayev çıxış ediblər. Onlar muğamlarımızın, xalq və bəstəkar mahnılarının bənzərsiz ifaçısı Sara xanımın füsunkar Qarabağ təbiətinin zənginliyi ilə köklənmiş geniş diapazonlu, şirin, məlahətli və ecazkar səsinin uzun illər milyonlarla insana sevinc bəxş etməsindən, görkəmli sənətkarın muğamın dərinliyinə, zənginliyinə nüfuz edərək onun ilkinliyini, saflığını göz bəbəyi kimi qorumasından, klassik muğam ifaçılarımızın yolunu böyük ustalıqla davam etdirməsindən, opera səhnəsində yaratdığı unudulmaz obrazların musiqi tariximizdə silinməz izlər qoymasından, bir sözlə, yaradıcılığının gənclər üçün əsl vətənpərvərlik, fədakarlıq və sənətə sədaqət nümunəsi olmasından söhbət açıblar.

Bildirilib ki, Azərbaycan Dövlət Opera və Balet Teatrında aparıcı partiyalarda çıxış edən Sara Qədimovanın adı opera səhnəsində yaratdığı Leyli və Əsli obrazları ilə yadda qalıb. Onun oxuduğu "Bayatı-Şiraz", "Şur", "Şahnaz", "Qatar", "Mahur-hindi", "Xaric segah" muğamları, müxtəlif Azərbaycan xalq mahnıları ifaçılıq sənəti tariximizə qızıl hərflərlə yazılıb.

Qeyd edək ki, Xalq artisti 2005-ci il mayin 12-də vəfat edib.