Mayın 15-də Xalq artisti, görkəmli bəstəkar Rauf Hacıyevin anadan olmasının 100 illiyi münasibətilə Fəxri xiyabanda məzarı ziyarət edilib.

AZƏRTAC xəbər verir ki, anım mərasimində tanınmış mədəniyyət və incəsənət xadimləri, bəstəkarın yaxınları iştirak ediblər.

Mərasimdə çıxış edənlər xüsusi olaraq vurğulayıblar ki, Prezident İlham Əliyev aprelin 13-də Xalq artisti Rauf Hacıyevin 100 illik yubileyinin qeyd edilməsi haqqında Sərəncam imzalayıb. Sərəncama əsəsən görkəmli bəstəkarın anadan olmasının 100 illiyi ölkəmizdə silsilə tədbirlərlə qeyd olunacaq.

Bildirilib ki, Rauf Hacıyevin bəstəkarlıq sahəsində formalaşmasında Üzeyir Hacıbəylinin mühüm əhəmiyyəti olub. Diqqətə çatdırılıb ki, mahnı janrı R.Hacıyevin yaradıcılığında aparıcı əhəmiyyət kəsb edir. Xüsusilə bəstəkarın həm ifaçılar, həm də musiqisevərlər arasında “Sevgilim”, “Mənim Azərbaycanım”, “Lirik mahnı”, “Bahar gəlir”, “Sevimli şəhər”, “Bakı haqqında mahnı”, “Leyla”, “Neft Daşlarında”, “Ceyran” və sair mahnıları daha çox populyarlıq qazanır.

Rauf Hacıyevin 15-ə qədər filmə musiqi yazdığını söyləyən çıxışçılar qeyd ediblər ki, bəstəkar yeddi operetta yazıb və onlardan beşi məhz Moskva Dövlət Operetta Teatrının səhnəsində tamaşaya qoyulub.

Qeyd edilib ki, operetta janrında çalışmaqla yanaşı R.Hacıyev musiqili teatrın başqa janrlarında da öz qələmini sınayıb.

Azərbaycan və dünya musiqi mədəniyyətinə böyük töhfələr vermiş Rauf Hacıyevin bənzərsiz yaradıcılığını yüksək qiymətləndirən natiqlər vurğulayıblar ki, adını mədəniyyət tariximizə böyük hərflərlə yazdırmış fitri istedad sahibinin əsərləri hələ çox yüzilliklər insanların mənəvi dünyasının zənginləşməsinə, zövqünün formalaşmasına xidmət edəcək.