×
Oktyabrın 8-də Azərbaycan Milli Xalça Muzeyində “Şuşanın tanınmış soyları” layihəsi çərçivəsində Qarabağın məşhur Qalabəyovlar soyuna həsr olunmuş mühazirə dinlənilib.
AZƏRTAC xəbər verir ki, tədbirdə mövzu ilə bağlı Qalabəyovlar nəslindən olan Urxun Qalabəyli və filologiya üzrə fəlsəfə doktoru, professor Ədalət Tahirzadə çıxış ediblər.
Muzeyin direktoru Şirin Məlikova dünən rəhbərlik etdiyi muzeyin “Humay” Milli Mükafatına layiq görüldüyünü bildirib. Deyib ki, bu mükafat muzey üçün böyük şərəfdir. Son illər muzeyin kolleksiyasının zənginləşdirildiyini deyən Şirin Məlikova bildirib ki, beynəlxalq əməkdaşlıq istiqamətdə böyük işlər görülür. Qeyd edib ki, yaxın günlərdə muzeydə XVII əsrin əvvəllərinə aid “Əjdahalı” xalçanın təqdimatı keçiriləcək.
Tədbirdə Urxun Qalabəyli bildirib ki, bu soyun kökü Otuziki elinin Xıdırlı oymağına bağlıdır. Kökdə dayanan isə Məhəmməd ağadır. Məhəmməd ağanın Hacı Lazım bəy adlı oğlu vardı. Hacı Lazım bəy Qarabağ xanlığının sərkərdələrindən olmuşdu. İbrahimxəlil xanın saray adamlarından sayılırdı. Divan gənəşiyində onun sözü keçərliydi. Məhəmmədxan bəy Hacılı-Cavanşirdən sonra Şuşa qalasının komendantı olmuşdu. Hacı Lazım bəyin törəməsi Qalabəyov soyadını daşıyırdı.
Çıxış zamanı XX əsrin əvvəllərində çəkilmiş Qalabəyovlar ailəsinin fotoşəkilləri proyeksiya olunub. Urxun Qalabəyli fotodakı şəxslər barədə məlumat verib.
Professor Ədalət Tahirzadə də bu nəslin Azərbaycan tarixinə bəxş etdiyi görkəmli şəxsiyyətlərdən danışıb.
Sonra Qalabəyovlar soyuna aid tarixi materiallar əsasında hazırlanmış videoçarx nümayiş olunub.
Sonra muzeyin ekspozisiyanın II mərtəbəsində “Qarabağ xalçaları” mövzusunda tematik ekskursiya keçirilib.
Qeyd edək ki, Azərbaycan Milli Xalça Muzeyi illərdir ki, xalqımızın milli-mədəni irsi olan əsrarəngiz Qarabağ xalçalarını təbliğ etməklə yanaşı, erməni vandalizminə məruz qalmış ərazilərimizin etnoqrafiyasını, tarixi abidələrini, məşhur şəxsiyyətlərini də geniş miqyasda tanıtmağa çalışır.
Muzeyin Şuşa filialının yeni başladığı “Şuşanın tanınmış soyları” layihəsi də bu baxımdan xüsusi əhəmiyyət daşıyır. Layihə “Şuşa İli” çərçivəsində xalqımız üçün müstəsna mənəvi dəyərə malik bir şəhərin tanınmış soyları, nəsilləri, onların tarixdəki rolu barədə faktların, maraqlı, dolğun məlumatların cəmiyyətə çatdırılması məqsədilə gerçəkləşdirilir