Azərbaycan Milli Xalça Muzeyində “Xalidə Nəsirovanın qurama dünyası” adlı sərgi açılıb.

AZƏRTAC xəbər verir ki, tədbirdə çıxış edən muzeyinin direktoru Şirin Məlikova sənətkarın zəngin, rəngarəng, ecazkar yaradıcı dünyası barədə danışıb.

Bildirib ki, Xalidə Nəsirova günümüzün ən görkəmli qurama ustalarından biridir. O, həyatının 30 ildən çoxunu qurama sənətinə həsr edib. İxtisasca kimyaçı olan Xalidə Nəsirovanın bu sənətə hobbi fəaliyyəti ilə başlayıb. Sonralar bu hobbi onu bütün dünyaya tanıdıb. Xalidə Nəsirova bu bədii ənənəni müasir dövrdə yaşadan, ona özünəməxsus dəst-xəti ilə həyat verən azsaylı qadın sənətkarlardandır.

Daha sonra sərgi ilə bağlı fikirlərini bölüşən Şirin Məlikova qeyd edib ki, Xalidə Nəsirovanın bu fərdi retrospektiv sərgisində 40-a yaxın müxtəlif qurama nümunəsi nümayiş etdirilir. Burada sənətkarın müəllifi olduğu əsərlərlə yanaşı, ona hədiyyə edilmiş XX əsrin əvvəllərinə aid quramalar da sərgilənir. X.Nəsirovanın quramalarının əksəriyyətini müxtəlif örtüklər, yastıq üzləri, dekorativ süfrələr, mozaik pannolar təşkil edir.

Sonra çıxış edən İçərişəhər Muzey Mərkəzinin direktoru Əminə Məlikova bildirib ki, Azərbaycan dekorativ-tətbiqi sənətinin əlvan koloritli, günəşli təbiətinin isti rənglərini özündə əks etdirən qurama sənəti ilə əsrlər öncə məşğul olublar. Əsərlərini eskizsiz hazırlayan Xalidə Nəsirovanın mürəkkəb və zəngin naxışlı kompozisiyalarının əsas mövzusu tarix, incəsənət, din və məhəbbətdir.

Əminə Məlikova, eyni zamanda, diqqətə çatdırıb ki, iyulun 7-dən avqustun 7-dək “İçərişəhər” Dövlət Tarix-Memarlıq Qoruğu İdarəsi, Bakı Şəhəri İcra Hakimiyyəti, Mədəniyyət Nazirliyi və Təhsil Nazirliyinin birgə təşkilatçılığı ilə Azərbaycanda ilk dəfə olaraq Milli Qurama Festivalı keçiriləcək. Festival zamanı Azərbaycan muzeylərinin fondlarında saxlanılan qurama nümunələri və qurama sənətkarlarının əl işlərindən ibarət sərgi nümayiş olunacaq, qurama məhsullarının hazırlanması üzrə ustad dərsləri keçiriləcək.

Qeyd edək ki, Xalidə Nəsirova ilk dəfə 1990-cı il 20 Yanvar faciəsi günlərində qəlbində baş qaldıran emosional hislərini ifadə edərək 3330 ədəd parça hissəsindən “Mənim dostlarım” adlı quramanı işləyib. Sonradan bu sənətə möhkəm bağlanaraq, zamanla qazanılmış təcrübə və peşəkarlıq sayəsində gözəl əsərlər yaradıb. “Avroviziya 2012”, 100-dən çox qalstukdan hazırlanmış “İçərişəhərin sirləri”, insanları qədim abidələri qorumağa səsləyən “İmdad” adlı işləri və digər çoxsaylı quramalarında sənətkarın özünəməxsus bədii axtarışları əksini tapıb.