Meşə fondu torpaqlarımızın hansı hissəsi ki, Tuqay meşələrinin ərazisinə düşür, orada meşəbərpa və yeni meşə zolaqlarının salınması ilə bağlı layihələr var. Bu, əsasən Kürboyu ərazilərdir. Burada seyrəlmiş və müəyyən səbəblərdən məhv olmuş meşələrin mərhələli şəkildə bərpası ilə bağlı layihələr həyata keçirilir.

İşğaldan azad edilmiş ərazilərdə biomüxtəlifliyin qorunması, xüsusi mühafizə olunan ərazilərin infrastrukturunun yaxşılaşdırılması və meşəbərpa işləri ilə bağlı BMT-nin Ərzaq və Kənd Təsərrüfatı Təşkilatı (FAO) ilə birgə layihələr planlaşdırılır və növbəti dövrlərdə onların gerçəkləşdirilməsi nəzərdə tutulur.

AZƏRTAC xəbər verir ki, bunu ekologiya və təbii sərvətlər nazirinin müavini Vüqar Kərimov deyib.

Nazir müavini bildirib ki, hazırda FAO ilə Ekologiya və Təbii Sərvətlər Nazirliyinin beş müxtəlif istiqamətdə layihələri davam edir. Bunlar əsasən bioloji müxtəlifliyin qorunması, balıqçılıq təsərrüfatının və akvakulturanın inkişafı, torpaqların deqradasiyası, qış otlaqlarının keyfiyyətinin yaxşılaşdırılması, meşə təsərrüfatının idarə olunması, meşələrin inkişafı və meşələrin mühafizəsi ilə bağlı həyata keçirilən layihələrdir: "Növbəti dövrlərdə FAO ilə razılaşdırılmış üç layihəmiz var. Həmin layihələr 200 hektar ərazidə meşəbərpa işlərinin aparılması, meşə ekosisteminin, meşələrin bioloji müxtəlifliyinin qorunması və başladığımız meşələrin inventarlaşdırılması prosesinin davam etdirilməsidir".