"Rəqibim güclüdür, amma mənim üçün bunun fərqi yoxdur. Sadəcə qələbəyə köklənmişəm".

AZƏRTAC xəbər verir ki, bu sözləri Azərbaycanın MMA idmançısı Vüqar Kərəmov “Rizin” Döyüş Federasiyasının Bakıda keçiriləcək “Landmark 7” turniri ilə bağlı təşkil olunmuş mətbuat konfransında deyib.

Axırıncı dəfə 10 il bundan qabaq Azərbaycanda vuruşduğunu qeyd edən idmançı bunun onun üçün nostalji hisslər olduğunu bildirib: "Uzun müddətdir xaricdə ölkəmi təmsil edirəm, amma bu dəfə Vətəndə vuruşacağam. Ümid edirəm ki, ortaya layiqli nəticə qoyacağam. Öz ölkəmdə döyüşmək böyük məsuliyyətdir. Buna görə də məşqlərimizi daha da gücləndirmişik. Heç bir idmançı istəməz ki, doğma yurdunda rəqibə məğlub olsun".

V. Kərəmov yaponiyalı rəqibi Çihiro Suzukinin döyüşlərini izlədiyini də vurğulayıb: "Onun potensialına və gücünə bələdəm. Rəqibimin şou xarakterli hərəkətlərinə önəm vermirəm. Nə olursa olsun soyuqqanlı yanaşmalıyam. Hərtərəfli hazıram”.

O, "Rizin"in Azərbaycanda təşkil olunmağını böyük uğur hesab edib: "Fəxr edirik ki, belə bir turnir ölkəmizdə keçirilir. Bu, MMA üçün böyük irəliləyiş olacaq. Həvəskar idmançılarımız üçün də böyük marağa səbəb olacaq. Onlarda bu idman növünə həvəs artacaq".

Qeyd edək ki, turnir noyabrın 4-ü start götürəcək.