Dekabrın 17-dən 24-dək Bakıda görkəmli şahmatçı, Avropa çempionu, beynəlxalq qrosmeyster Vüqar Həşimovun xatirəsinə həsr olunan “Vugar Gashimov Memorial-2022” superturniri keçiriləcək. 2014-cü ildən keçirilən turnirdə dünya şahmatının elitası mübarizə aparır.

Turnirin direktoru, Əməkdar məşqçi Anar Allahverdiyev yarışla bağlı AZƏRTAC-ın müxbiri ilə söhbətində deyib: “Bu ay Vüqar Həşimovun xatirəsinə səkkizinci superturnir start götürəcək. Hər il bu yarış ölkəmizdə böyük səs-soraq doğurur, dünya ictimaiyyətinin diqqəti bu turnirə yönəlir. Turnirdə ənənəvi olaraq dünyanın ən güclü şahmatçıları mübarizə aparır. Bu il oyunçuların seçim konsepsiyasını bir az dəyişdik. Bu dəfə gənclərə üstünlük verdik. Artıq 4 ildir “Vüqar Həşimov” şahmat klubu fəaliyyət göstərir və avrokuboklarda iştirak edirik. Klub 2019-cu ildə yaradılanda əsas məqsədimiz gənc şahmatçıların komandaya cəlb olunması idi. Hansı ki, onlar əmsal və digər səbəblərə görə superturnirlərdə iştirak edə bilmirlər. Biz onlar üçün bu şansı yaradırıq. Bu, Vüqarın arzusu idi ki, gənc şahmatçılara kömək etsin. O, yeniyetmə şahmatçılar üçün paytaxtda və bölgələrdə bir neçə seminar keçirmişdi. Biz də bu ideyanın davamı kimi məhz gənc şahmatçılara önəm veririk. Bu il “Vüqar Həşimov” klubu Respublika Olimpiadasında təmsil olunub və bürünc mükafat əldə edib. Bu konsepsiyadan irəli gələrək turnirə daha çox gənc şahmatçı dəvət etdik”.

Vüqarın şahmata olan sevgisi ailədən gəlib

Vüqar Həşimovun bacısı Samirə Allahverdiyeva qardaşı ilə bağlı xatirələrini danışarkən deyib: “Vüqarın şahmata olan sevgisi ailədən gəlib. Atam övladlarına şahmata olan sevgisini aşılayıb. Vüqar 6 yaşından şahmatla məşğul olmağa başlayıb və demək olar ki, ilk müəllimi atam olub. Digər qardaşım Sərxan da həmin vaxtdan şahmatın sirlərini öyrənib. O vaxtdan şahmat bizim ailədə gündəlik həyat tərzinə çevrilmişdi.

Vüqarın turnirlərdən qələbə xəbərini almaq ailə üzvlərimizi, bir bacı kimi məni qürurlandırırdı. O, demək olar ki, iştirak etdiyi yarışlardan mükafatlar və fəxri diplomlarla qayıdırdı. 2009-cu ildə Serbiyanın Novı Sad şəhərində komandalar arasında Avropa çempionatı keçirilmişdi. Ölkəmiz həmin yarışda məhz Vüqarın 7 saat davam edən görüşünün sonunda qələbə qazanması ilə ilk dəfə Avropa çempionu oldu. Bu görüşün nəticəsindən asılı olaraq ilk üç yerin mükafatçıları bəlli olacaqdı. Vüqarın qələbəsi bütövlükdə Azərbaycana uğur gətirdi. Bu qələbəsi ilə o, bütün dünyaya səs salmış oldu. Bu qələbə və onun görüntüləri hamının yaddaşına həkk olunub. Çox sevindirici haldır ki, ilkə imzanı məhz mənim qardaşım atıb. Düzdür, şahmatçılarımız sonradan 2 dəfə yenidən Avropa çempionatında qızıl medal qazanıblar. Ancaq ilk çempionluq tam başqa və nailiyyətdə Vüqarın payı isə böyük idi”.

Dünya şahmat elitasının nümayəndələri “Vugar Gashimov Memorial-2022”də

Turnirin iştirakçılarına toxunan Anar Allahverdiyev deyib: “Yarışa qatılacaq gənc şahmatçılar yetərincə güclü və dünya şahmatında xüsusi çəkiyə malik olan zəka sahibləridir. Belə ki, 12 yaşlı hindistanlı şahmatçı Qukeşin əmsalı 2700-dən artıqdır və top oyunçular sırasında yer alır. Bundan əlavə yerli şahmatçılarımız – “Aeroflot Open” turnirinin qalibi, 14 yaşadək şahmatçılar arasında dünya çempionu Aydın Süleymanlı, gənclər arasında qitə birinciliyinin qalibi Abdulla Qədimbəyli də turnirdə mübarizə aparacaqlar. Həmçinin dünya və Olimpiya çempionu, özbəkistanlı Nodirbek Abdusattorov da yarışacaq. Gənc şahmatçılarla yanaşı, yarışda təcrübəli Şəhriyar Məmmədyarov, Rauf Məmmədov, Rumıniya təmsilçisi Riçard Rapport, ABŞ şahmatçısı Semuel Şenklend, ispaniyalı Valeho Pons və çinli Van Hao da mübarizə aparacaqlar və maraqlı sintez olacaq. Bütün şahmatsevərləri maraqlı və gərgin idman mübarizəsi ilə dolu yarış gözləyir. Yarışı izləməyə çox sayda tamaşaçı gələcək, həmçinin internet üzərində də izləmək mümkün olacaq”.

Vüqarın bir arzusu var idi...

Samirə Allahverdiyeva bildirib ki, Vüqarla bağlı xatirələri çoxdur. Düzü, mən Vüqarın yoxluğunu qəbul etmirəm. O, həmişə səfərlərdə, yarışlarda olduğu üçün sanki bizi gedişinə hazırlamışdı. Qardaşım olduğu üçün demirəm, çox möhtəşəm insan idi. Onu tanıyanlar arasında Vüqardan söhbət düşəndə hamının üzündə təbəssüm olur. Kövrək, ürəyiaçıq, hər bir insana qarşı fərdi münasibət göstərən biri idi. Uşaqlar Vüqarı çox sevirdi. O, heyvanlara da qayğı ilə yanaşırdı. Tez-tez zarafatlarımızı və oyunlarımızı xatırlayıram. Hamını bir araya toplamağa çalışırdı. Səsi-küyü çox sevirdi. Həmişə səfərdən qayıdandan sonra qohumlar, dostları ilə görüşürdü.

Vüqarın bir arzusu var idi, şahmat məktəbi açsın və idmanın bu növünün sirlərini uşaqlara aşılasın. Özü bu arzusuna çata bilməsə də, valideynləri onun bu istəyini reallaşdırdılar. Hazırda onun adını daşıyan iki akademiya fəaliyyət göstərir. Burada 300-dək şahmatçı tədris alır. Onların arasında mötəbər yarışlarda mükafatçılar sırasına düşən şahmatçılar var. Bu, bizi çox sevindirir. Çünki onlar hamısı Vüqarın adını yerli və beynəlxalq turnirlərdə layiqincə təmsil edirlər.

Akademiyaların birində Vüqar Həşimovun adına muzey də fəaliyyət göstərir. Orada Vüqarın qazandığı kuboklar, medallar və fəxri fərmanlar sərgilənir. Burada ona verilən xüsusi hədiyyələr və digər idman növlərinə olan marağından irəli gələn əşyaları da yer alır.

Qeyd edək ki, turnirdə 10 şahmatçı dairəvi sistem üzrə rapid və blits yarışlarında mübarizə aparacaq. Yarışın ilk 3 günündə rapid üzrə 9 tur oynanılacaq. Hər şahmatçı 1 gündə 3 turda gücünü sınayacaq. Birgünlük fasilədən sonra şahmatçılar bir-biri ilə 2 dəfə qarşılaşmaq şərti ilə blits üzrə ümumilikdə 18 turda güclərini sınayacaqlar. Yarış Vüqar Həşimov Şahmat Fondunun təşkilatçılığı, Gənclər və İdman Nazirliyinin və Azərbaycan Şahmat Federasiyasının dəstəyi, SOCAR-ın sponsorluğu ilə “Fairmont Baku” hotelində baş tutacaq