Qadın voleybolçular arasında Yüksək Liqada çempion olan "Azərreyl" komandası mükafatlandırılıb.

AZƏRTAC xəbər verir ki, qızıl medalları kollektivə Azərbaycan Voleybol Federasiyasının prezidenti Şahin Bağırov, vitse-prezident Faiq Qarayev, Milli Olimpiya Komitəsinin (MOK) vitse-prezidenti Çingiz Hüseynzadə və Avropa Voleybol Konfederasiyasının (CEV) prezidenti Roko Sikiriç təqdim ediblər.

Finalda məğlub olan "Abşeron" komandası gümüş, üçüncü yer uğrunda görüşlərdə "Gəncə"ni üstələyən "Milli Aviasiya Akademiyası" bürünc medallara layiq görülüb.

Mükafatlandırma mərasimində çıxış edən Çingiz Hüseynzadə maraqlı final qarşılaşması izlədiklərini bildirib: "Hər iki tərəfi təbrik edirəm. Azarkeşlərə gözəl oyun nümayiş etdirdilər. Təşkilatçılıq möhtəşəm idi. Voleybol ölkəmizdə daim inkişaf edir".

Roko Sikiriç Azərbaycana səfər etdiyi üçün xoşbəxt olduğunu vurğulayıb: "Burada olmaq böyük şərəfdir. Hər iki kollektiv əla oyun göstərdi. Bu gün bizim üçün əsl bayram ab-havası oldu. "Azərreyl"i təbrik edirəm".

Şahin Bağırov isə hər iki komandanın mövsüm ərzində layiqli mübarizə apardığını diqqətə çatdırıb: "Buna görə onlara təbrik düşür. Ümid edirəm ki, bu cür finalları daha çox izləyərik. Dövlət tərəfindən hər zaman idmana böyük qayğı göstərilir. Bunun sayəsində idmançılarımız beynəlxalq arenalarda uğurla çıxış edirlər".

Qeyd edək ki, kişi voleybolçular arasında Yüksək Liqada isə final matçı aprelin 25-də "Murov Az Terminal" və "Azərreyl" klubları arasında olacaq. İlk qarşılaşma “dəmiryolçular”ın 3:0 hesablı qələbəsi ilə yekunlaşıb.