Dekabrın 8-də "Virtual Diabet Məktəbi" layihəsinin və diabetim.az saytının təqdimatı keçirilib.

AZƏRTAC xəbər verir ki, tədbirdə çıxış edən İcbari Tibbi Sığorta üzrə Dövlət Agentliyinin sədri Zaur Əliyev ölkəmizdə 290 minə yaxın şəkərli diabet xəstəsinin qeydiyyatda olduğunu və son illər bu rəqəmin 5-6 faiz artdığını qeyd edib. "Lakin bu rəqəmlər kifayət etmir. Çünki ölkəmizdə hələ də xəstəliyindən xəbərsiz olan vətəndaşlar var. Onlar adətən ağırlaşanda bundan xəbər tuturlar. Ağırlaşmalar böyrək çatışmazlığı, aşağı ətrafların amputasiyası ilə nəticələnir. Bu da həm səhiyyə xərcinin artmasına, həm də vətəndaşın həyat tərzinə təsir edir", - deyə Z.Əliyev qeyd edib.

Agentliyin sədri icbari tibbi sığortanın xidmətlər zərfinə şəkərli diabetin vaxtında aşkarlanması və diaqnoz qoyulmasının da daxil olduğunu xatırladıb.

Danimarkanın Türkiyədəki səfiri Danni Annan, Novo Nordisk şirkətinin korporativ vitse-prezidenti Emil Larsen diabetin bütün dünyanı narahat edən problem olduğunu və layihənin xəstəliklə mübarizədə töhfə verəcəyinə inandıqlarını bildiriblər.

Milli Məclisin Səhiyyə komitəsinin sədri Əhliman Əmiraslanov, Heydər Əliyev Fondunun Beynəlxalq əlaqələr departamentinin rəhbəri, Milli Məclisin Səhiyyə komitəsinin üzvü Soltan Məmmədov ölkəmizdə şəkərli diabetdən əziyyət çəkənlərə dair qəbul edilən qərarlardan, qanunvericiləyə edilən dəyişikliklər, Heydər Əliyev Fondunun diabetdən əziyyət çəkən uşaqlara dair layihəsi və layihə çərçivəsində görülən işlər haqqında məlumat veriblər.

Sonra İcbari Tibbi Sığorta üzrə Dövlət Agentliyinin Beynəlxalq əlaqələr departamentinin koordinatoru Əsmər Kərimli "Virtual Diabet Məktəbi" haqqında məlumat verib.

Sonra diebetim.az veb-saytı təqdim olunub.

Diabetin xəstəlik deyil həyat tərzi olduğunu qeyd edən Azərbaycan Endokrinologiya, Diabetologiya və Terapevtik Təlimat Assosiasiyasının sədri, Azərbaycan Dövlət Həkimlərin Təkmilləşdirmə İnstitutunun kafedra müdiri, professor Valeh Mirzəzadə pasiyentlərin maarifləndirilməsinin vacibliyindən bəhs edib.

Sonda layihə ilə bağlı təəssürat videosu nümayiş etdirilib.

Tədbir zamanı, həmçinin "Diabetli uşaqlara ən yüksək qayğı" layihəsinə dair də videoçarx nümayiş etdirilib.