Bakıda keçirilən atıcılıq üzrə 53-cü dünya çempionatında 14 rekord qeydə alınıb.

Bu sözləri Beynəlxalq Atıcılıq Federasiyasının baş katibi Villi Qrill Bakıda keçirilən atıcılıq üzrə 53-cü dünya çempionatının bağlanış mərasimindən sonra jurnalistlərə açıqlamasında deyib. Baş katib bildirib ki, indiyə qədər atıcılıq üzrə bu sayda rekord qeydə alınmayıb:

“2024 Paris Yay Olimpiya Oyunlarına lisenziyanın verilməsinin məhz bu çempionatda keçirilməsi də xüsusi bir haldır”.

O, Azərbaycan Atıcılıq Federasiyasının baş katibi Emin Cəfərova xüsusi təşəkkür etdiyini vurğulayıb: “O, mənim həmkarım deyil, sanki doğma qardaşımdır. Emin bəy bizə federasiyada çox kömək etdi. Həmçinin sizin könüllülərdə çox fəaldırlar. Mənim 30 illik karyeram ərzində Azərbaycan könüllüləri kimi çevik və məsuliyyətli gənclər görməmişəm”.

Villi Qrill Azərbaycanın beynəlxalq yarışları yüksək səviyyədə təşkil etdiyini diqqətə çatdırıb: “Ölkəniz yarışların təşkilatçılığı baxımından çox mükəmməl bir sferadadır. Bakı Atıcılıq Mərkəzi olduqca unikal məkandır. Bakı şəhəri isə çox möhtəşəmdir”.