Bəlkə də ömrünü güllərə bağladığına görə özü də gül kimi füsunkar və təravətli qalıb. O, bu illər ərzində daha çox güllərlə “danışıb”, “dərdləşib”. O, gülləri vaxtsız-vədəsiz solmağa qoymadığı kimi güllər də öz təravət və gözəlliyindən ona pay verib. Bunu xoşbəxtlik, bəlkə də bir tale qisməti hesab etmək olar.

Hamı onu aktrisa və floraçı-rəssam kimi tanıyır. Əslində isə ixtisasca mühəndisdir. O, Neft-Kimya İnstitutunun (indiki ADNSU) Kimya texnologiyası fakültəsini bitirib. Bir il Elmi-Tədqiqat İnstitutunda işləyib. Sonralar isə C.Cabbarlı adına “Azərbaycanfilm” kinostudiyasında mühəndis kimi çalışıb.

Doğulduğu ailədə 7 bacı və bir qardaş olublar. Dediyinə görə, hamısı ali təhsillidir. Bəzilərinin hətta elmi dərəcəsi də var. Suğra isə ailənin incəsənətlə məşğul olan yeganə üzvüdür.

AZƏRTAC-ın əməkdaşı “Ulduz”, “Yollar və küçələr”, “Alma almaya bənzər”, “Şir evdən getdi”, “Tələ”, “Yuxu”, “Güllələnmə təxirə salınır” və s. filmlərdə yaratdığı müxtəlif xarakterli rolların ifaçısı, Əməkdar artist Suğra Bağırzadə ilə kinostudiyadakı iş otağında görüşüb. “Floristika” İncəsənətə Dəstək İctimai Birliyinin yaradıcısının iş otağı daha çox bir gülüstanı xatırladır...

Suğra xanım hazırda çalışdığı və sevdiyi sənətlərin heç birisi ilə əlaqədar təhsil almayıb. Onda floristikaya maraq uşaq vaxtlarından yaranıb. Həmsöhbətim deyir: “Floristika sənətinin sahibi çiçəklərin növ və çeşidlərini tanımaqdan başqa onların təbiətini mükəmməl öyrənməli, rənglərin bütün qanunauyğunluqlarını tanımalı, "çiçəklərin dili"nə dərindən yiyələnməlidir”.

Anası Məleykə xanımın güllərə olan sonsuz sevgisi Suğrada çiçəklərə qarşı dərin məhəbbət oyadıb. Həmin günləri belə xatırlayır: “Anamın çoxlu dibçək gülləri vardı və o güllər solanda qanı qaralardı. Uşaq olsam da, ona güllərin solmaması üçün bir şey fikirləşəcəyimi deyirdim. Düzü bunu necə etməyin yolunu bilmirdim. Lakin Neft-Kimya İnstitutunda təhsil alanda məhlulları, dinamikanı, ağırlığı və hərəkəti öyrənirdik. Yavaş-yavaş gülləri saxlamaq üsuluna da yiyələnirdim”.

Suğranın bu sahədə ilk əl işi hazır olanda valideynləri həyatda yox idilər. O, anasına verdiyi sözü tutsa da, həyatda çox şeylər dəyişmişdi. Güllərin ömrün uzadaraq onları solmağa qoymasa da, ömrün kövrək və həzin günləri solub getmiş, valideynləri xatirəyə dönmüşdü...

Florist kimi ilk əl işini anasının məzarı üstünə qoyaraq deyib: “Ana sənin arzunu yerinə yetirdim”. Yağış damcıları onu xarab etsə də, anasının ruhuna həsr etdiyi gülləri qoyduğu yerdən götürməyib.

Kinodan fərqli olaraq, bu, onun fərdi işidir, çox böyük zəhmət tələb edir. Özü deyir ki, iriliyindən-xırdalığından asılı olmayaraq bir işin tamam-kamal hazırlanıb başa gəlməsi üçün azı iki il lazımdır: “Çəmənlikdə lalələr” əsərini hazırlamaq üçün əvvəlcə çəmənliyi, sonra lalələri düzmüşəm. Həmin iş nə az, nə çox, düz dörd ilə başa gəlib. Başqa cür mümkün də deyil. Çiçəklər incədir, onların xasiyyəti fərqlidir. Elə olur gecəni səhərədək, yaxud səhərdən axşama kimi bir əsər üzərində işləyirəm”.

Emalatxanası olmasa da, kinostudiyada ona otaq ayırıblar. Özünün yaradıcılıq məhsulu olan əsərlərini sərgilərdə nümayiş etdirir. Onu da qeyd edək ki, o, “Floristika” kitabının müəllifidir və sənətsevərlər onun əsərlərinə böyük maraq göstərirlər. Bu sahədə ona kütləvi informasiya vasitələri də yaxından dəstək olur.

Suğra Bağırzadə güllərin xarab olmamağı üçün xüsusi məhluldan istifadə etdiyini söyləyir: “Ləçəklərin qalınlığından asılı olaraq, məhlulların tərkibi dəyişir. Çünki ağır maye olanda çiçəklər şux və təravətli qalmır. Burada həm mühəndis hesablamaları, həm də rəssam fikri var. Hansı sənətin yolçusu olursansa ol, çalışqan və zəhmətkeşlik olmasa, heç nəyə nail olmaq mümkün deyil”.

Suğra xanım iki övlad anasıdır, həyat yoldaşı da mühəndisdir. Onların ailə həyatı qurmağının maraqlı tarixçəsi var. Florist-aktrisa “Ulduz” filminə çəkiləndə səkkizinci sinfi yeni bitiribmiş. Naxçıvanda bu ekran əsərini izləyən Çingiz Rzayev deyib ki, mən bu filmdəki qızı mütləq axtarıb tapacağam. Dediyi kimi də edir. Bakıya gəlib Politexnik İnstitutunda (indiki ATU) oxuyanda Suğra xanımı tapır və onların “ulduz”u barışır.

Bu il yetmiş beş illiyini üç fərdi sərgi ilə qeyd edən floraçı-rəssam hazırda yeni əsərlər üzərində işlədiyini deyib: “Xalqımızın qazandığı tarixi Qələbə yaradıcılıq ilhamıma yeni qanad verib. Qarabağa, Şuşanın işğaldan azad olunmasına bir neçə əsər həsr etmişəm. Hazırda “Xarıbülbül” əsəri üzərində işləyirəm. Həmin əsəri Ulu Öndər Heydər Əliyevin 100 illik yubileyinə qədər tamamlamaq niyyətindəyəm”.

Ömrünün yeddi onilliyini arxada qoyan Suğra xanım təbii və şux qalmağının səbəbini “qocalmağa vaxtının olmamağı” ilə əlaqələndirir. İndiyədək estetik cərrahların bıçağından uzaq olan florist-aktrisa düzgün qidalanmağın və idman etməyin sağlamlıq, gözəllik və gənclik üçün ən vacib şərt olduğunu deyir. Hələ də gənclik təravətini itməyə qoymayan Suğra xanım səhərlər idman edir, piyada çoxlu gəzir. Kitab oxuyur, tamaşalara baxır. Maraqlıdır ki, dünyanın hansı ölkəsinə gedirsə, mütləq orada teatra baş çəkir. Ən başlıcası, özünün gül-çiçək dünyası var və həmin dünyanın sakini həmişə çiçəklərin özü kimi təravətli olmalıdır