44 günlük İkinci Qarabağ müharibəsi Azərbaycan gənclərində torpaq, Vətən sevgisinin nə qədər böyük olduğunu nümayiş etdirdi. Vətən müharibəsində gənclərimizin göstərdiyi igidlik əsl vətənpərvərlik məktəbidir. Hər birimizin borcu bu məktəbi öyrənmək, şahidlərimizin xatirəsinə hörmət, qazilərimizə diqqət və qayğı ilə yanaşmaqdır.

Bu sözləri AZƏRTAC-a müsahibəsində Azərbaycan Vətən Müharibəsi Veteranları İctimai Birliyinin Yasamal rayon şöbəsinin sədri, qazi Salman Hüseynov 175 saylı orta məktəbdə şəhid Xəyal Balakişiyevin barelyefinin açılışı zamanı deyib.

Birinci Qarabağ müharibəsində Hərbi Dəniz Qüvvələrinin xüsusi təyinatlısı kimi iştirak etdiyini vurğulayan S.Hüseynov bildirib: “Həm Birinci, həm də İkinci Qarabağ müharibələrində iştirak etmişəm. Birinci Qarabağ müharibəsi xalqımız üçün ağır nəticələrlə yadda qaldı. Müharibədə dəfələrlə yaralanmağıma baxmayaraq, döyüşlərdə iştirak edirdim. Çünki ərazilərimizin mənfur düşmən tərəfindən işğal olunmasına dözə bilməzdim”.

S.Hüseynov Azərbaycan Silahlı Qüvvələrinin tarixi missiyasını şərəflə yerinə yetirərək Ermənistanın 30 il işğal altında saxladığı ərazilərimizi 44 gün ərzində düşməndən azad etməsindən sonsuz qürur doğurduğunu bildirib: “Müzəffər Ali Baş Komandan İlham Əliyevin rəhbərliyi altında Azərbaycan Ordusu yüksək peşəkarlıq və hərbi taktika nümayiş etdirərək düşməni darmadağın etdi. Hərb tariximizə “Dəmir Yumruq” əməliyyatı kimi yazılan Vətən müharibəsində qazandığımız Zəfər Azərbaycan xalqının dəmir iradəsinin, əzminin, birliyinin, vətənpərvərlik ruhunda böyümüş gənc nəslin qələbəsidir. Azərbaycan xalqı bu Qələbə ilə sonsuz qürur duyur”.