İkinci Fəxri xiyabanda Vətən müharibəsi şəhidi Ülvi Hacıyevin anım mərasimi keçirilib.

AZƏRTAC xəbər verir ki, şəhidin ailə üzvlərinin, Dövlət Gömrük Komitəsinin əməkdaşlarının, digər şəhid ailələrinin üzvlərinin və qazilərin iştirak etdikləri tədbirdə əvvəlcə respublikamızın ərazi bütövlüyü uğrunda canlarından keçən qəhrəman Vətən övladlarının xatirəsi bir dəqiqəlik sükutla yad olunub.

Tədbirdə çıxış edənlər şəhidin həyatından, keçdiyi döyüş yolundan, göstərdiyi şücaətdən danışıblar. Bildirilib ki, şəhid Ülvi Hacıyev Vətən müharibəsi zamanı Cəbrayılın, Xocavəndin Hadrut qəsəbəsinin və Füzulinin azadlığı uğrunda gedən döyüşlərdə iştirak edib. O, oktyabrın 19-da Füzuli döyüşləri zamanı şəhid olub.

Qeyd edək ki, Ülvi Hacıyev 1994-cü il noyabrın 13-də Bakıda dünyaya göz açıb. Suraxanı rayonunda 141 nömrəli tam orta məktəbdə təhsil alıb. 2012-2016-cı illərdə Azərbaycan Dövlət İqtisad Universitetində bakalavr, 2016-2018-ci illərdə həmin ali təhsil ocağında magistr təhsili alıb. 2018-2019-cu illərdə Azərbaycan Silahlı Qüvvələri sıralarında müddətli həqiqi hərbi xidmətdə olub.

Vətən müharibəsinə könüllü yollanan şəhid Ülvi Hacıyev Azərbaycan Respublikası Prezidenti İlham Əliyevin sərəncamları ilə ölümündən sonra “Vətən uğrunda”, “Füzulinin azad olunmasına görə”, “Cəbrayılın azad olunmasına görə” və “Xocavəndin azad olunmasına görə” medalları ilə təltif edilib.