Vətən müharibəsi şəhidi Zeynallı Rəşad Qiyas oğlunun doğum günü ilə əlaqədar məzarı ziyarət olunub.

AZƏRTAC xəbər verir ki, Nəsimi Rayon İcra Hakimiyyətinin başçısının, Yeni Azərbaycan Partiyası Nəsimi rayon təşkilatının sədrinin, rayon ictimaiyyətinin nümayəndələrinin və şəhidin ailə üzvlərinin iştirak etdikləri ziyarət zamanı Vətən müharibəsi qəhrəmanının əziz xatirəsi ehtiramla yad olunub, məzarı üzərinə gül-çiçək dəstələri düzülüb.

Bildirilib ki, Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin müvafiq Sərəncamlarına əsasən Rəşad Zeynallı ölümündən sonra “Vətən uğrunda”, “Cəbrayılın azad olunmasına görə”, “Qubadlının azad olunmasına görə”, “Döyüşdə fərqlənməyə görə” və “Cəsur döyüşçü” medalları ilə təltif edilib.

Çıxışlarda Vətən müharibəsində qazanılan şanlı Qələbənin Azərbaycan tarixində əbədi qalacağı qeyd olunub. Vurğulanıb ki, müharibənin taleyini müəyyənləşdirən Prezident, Müzəffər Ali Baş Komandan İlham Əliyev və döyüş meydanında əsl qəhrəmanlıq göstərən Azərbaycan əsgəri oldu. Uzun illərdən bəri düşmən tapdağı altında qalmış torpaqlarımızın Azərbaycan Ordusunun qazandığı tarixi Zəfər nəticəsində işğaldan azad edilməsi xalqımızın öz liderinə və ordusuna inamını daha da möhkəmləndirdi.

Şəhidin ailə üzvləri göstərilən diqqət və qayğıya görə minnətdarlıqlarını bildiriblər.

Qeyd edək ki, Rəşad Qiyas oğlu Zeynallı 1998-ci aprelin 21-də Bakıda anadan olub. Azərbaycan Silahlı Qüvvələrinin əsgəri kimi 2020-ci il oktyabrın 8-də Vətən müharibəsi döyüşlərində şəhidlik zirvəsinə yüksəlib. Rəşad Zeynallı 2004-2008-ci illərdə İ.Əfəndiyev adına Elitar Gimnaziyada, 2008-2015-ci illərdə isə P.Nəzərov adına 60 nömrəli tam orta məktəbdə təhsil alıb. 2014-2018-ci illərdə Azərbaycan Texniki Universitetində (ATU) “Cihazqayırma mühəndisliyi” ixtisasına yiyələnib.