Dünya şöhrətli caz pianoçusu Vaqif Mustafazadənin anadan olmasından 82 il ötür. Bu münasibətlə ADA Universiteti və Vaqif Mustafazadə adına Xeyriyyə Fondunun birgə təşkilatçılığı ilə martın 17-də görkəmli caz ifaçısının musiqi irsinə həsr olunan konsert təşkil edilib.

AZƏRTAC xəbər verir ki, “Vaqif Mustafazadə və Uillis Konnover” mövzusunda keçirilən tədbirdə dahi bəstəkar Vaqif Mustafazadənin keçdiyi yaradıcılıq yoluna nəzər salınıb, “Amerikanın səsi” radiosunda 40 ildən çox “Caz saatı” verilişinin aparıcısı olmuş Uillis Konnoverin Vaqif Mustafazadəyə həsr etdiyi verilişlərdən bəhs olunub.

Qeyd olunub ki, orijinal ifaçılıq üslubuna malik Vaqif Mustafazadə muğamlarımızı ənənəvi caz texnikası ilə birləşdirərək muğamla cazın sintezini yaradıb. Onun bu kimi yenilikləri indi də aktuallığını qoruyub saxlayır. Bu günün özündə belə bir çox musiqiçilər öz ifalarında məhz Vaqif Mustafazadənin yaratdığı caz-muğam sintezindən istifadə edir.

Tədbirdə Azərbaycan musiqiçilərinin ifasında Amerika caz musiqisi nümunələri və Vaqif Mustafazadənin əsasını qoyduğu caz-muğam üslubunda kompozisiyalar səsləndirilib.

Konsertdə Vüsal Aydəmirov (piano), Hidayət Sadiqbəyli (piano), Elbəy Məmmədzadə (trio), Nicat Aslanov (trio), Əfqan Rəsul (trio) və Teymur Süleymanlı (band) çıxış ediblər.