×
Son zamanlar həm dərman müalicəsinin inkişafı, həm invaziv müdaxilələrin, həm də ürək cərrahiyyəsinin sayının artması ilə əlaqədar olaraq insan ömrü uzanıb. Bu, müsbət hal olsa da, nəticədə yeni bir xəstə qrupu ilə də qarşılaşdıq. Hazırda ürək çatışmazlığı xəstəlikləri çox artıb. Dünyada kardiologiya sahəsində ürək çatışmazlığı mütəxəssisliyi, ürək çatışmazlığı xəstəxanalarının yaradılması planlaşdırılır. Ürək çatışmazlığına ürəyin onkologiyası da deyilir. Dünyada həmin sektora dair dərman müalicəsi, cərrahi müalicələrdə çox yeniliklər var. Ən çox yenilik və innovasiyaların olduğu xəstəlik qrupu ürək çatışmazlığı xəstəliyi qrupudur. Azərbaycan kardioloqlarını dünyada olan yeniliklərlə tanış etmək, xarici ölkələrdən gələn mütəxəssislərin təcrübələrini bölüşməsi üçün Ürək çatışmazlığında yeniliklər konqresini təşkil etdik. İnanırıq ki, bu, Azərbaycan xalqına verilən kardioloji xidmətin səviyyəsini də artıracaq. Ümumiyyətlə, ürək çatışmazlığına dair ayrıca konfransların təşkili də dünyada yenidir. Biz də həmin tendensiyaya qoşulduq və bunu davam etdirəcəyik.
Bunu AZƏRTAC-a müsahibəsində Azərbaycan Kardiologiya Cəmiyyətinin sədri Üzeyir Rəhimov deyib.
Cəmiyyətin sədrinin sözlərinə görə, hərəkət qabiliyyətinin azalması, tez yorulma, yol gedərkən təngnəfəs olmaq, gecələr boğulmalar, sinədə göynəmə, mədədən boğaza yayılan göynəmə, ayaqlarda şişlik olması ürək çatışmazlığının ilkin əlamətləridir. Ürək ağrıları boyun, boğaza, qollara, çənəyə qədər yayıla, ağrılar zamanı bədən tərləyə bilər. Həmçinin ürək çatışmazlığı xəstələrində ölüm qorxusu müşahidə olunur. Bəzən isə ürəyin arxa divar infarktı mədə ağrısı ilə qarışdırıla bilər. Ürək çatışmazlığı üçün risk qrupu olanlar - xüsusilə təzyiqi, şəkəri, ürək problemi olan xəstələr daha diqqətli olmalıdırlar. Hər bir insan 40 yaşından sonra ildə bir dəfə yoxlamadan keçməlidir. Lakin ürək problemi olanlar altı aydan bir, ağır ürək çatışmazlığı olanlar isə daha tez-tez müayinə olunmalıdırlar. Ailəsində, nəslində ürək çatışmazlığı olanlar, şəkərli diabetdən əziyyət çəkənlər xəstəliyin ortaya çıxmasını gözləmədən tez-tez yoxlamadan keçməlidirlər.
Ürək xəstəliklərinin gəncləşdiyini deyən kardioloq buna səbəb kimi hərəkətsizlik, qeyri-düzgün qidalanma nəticəsində təzyiq, şəkər, qanda xolesterinin miqdarı, o cümlədən çəkinin artmasını göstərib.
“Ürək xəstəlikləri adətən yavaş-yavaş inkişaf edir. Özünü büruzə verəndə gecikmiş ola bilər. Ona görə də mütəmadi müayinə önəmlidir. Ailəsində ürək problemi olanlar daha erkən yaşlardan yoxlanılmalıdır. Dünyada təzyiq və xolesterinin yoxlanılması uşaq yaşlarına endirildi. “Hyperchild” adlandırılan beynəlxalq layihəyə Azərbaycan da qoşulur. Bu, uşaqlarda təzyiq araşdırılmasının aparılmasıdır. Hazırda dünyanın 24 ölkəsində həmin layihə icra olunur. Azərbaycan sentyabrdan həmin prosesə başlayacaq. Məqsəd xəstəlikləri erkən yaşlardan aşkarlayıb qarşısını almaqdır”, - deyə Ü.Rəhimov bildirib.