Ölkəyə vaksinlərin saxlanılması üçün soyuq zəncir sisteminə aid edilən, Ümumdünya Səhiyyə Təşkilatının (ÜST) tələblərinə cavab verən soyuducu və dondurucu aparat və digər ləvazimatların gətirilməsi nəzərdə tutulub.
×
Ölkəyə vaksinlərin saxlanılması üçün soyuq zəncir sisteminə aid edilən, Ümumdünya Səhiyyə Təşkilatının (ÜST) tələblərinə cavab verən soyuducu və dondurucu aparat və digər ləvazimatların gətirilməsi nəzərdə tutulub. Nəzərə almaq lazımdır, ölkədə həmin tələblərə cavab verən soyuducu və digər avadanlıqların alınmasının üzərindən 10 ildən çox vaxt keçib. Bu avadanlıqların yenilənməsinə ciddi ehtiyac var. Bu, 2022-ci ilin hədəfləri arasındadır.
AZƏRTAC xəbər verir ki, bu barədə “Fəaliyyət üçün məlumat: Effektiv strategiyaların işlənib hazırlanması yolu ilə COVID-19 vaksinlərinin geniş tətbiqinə nail olmaq" adlı konfransda Respublika Gigiyena və Epidemiologiya Mərkəzinin İmmunoprofilaktika şöbəsinin əməkdaşı Əlcəfər Cəfərov məlumat verib.
O qeyd edib ki, İnnovasiya və Təchizat Mərkəzinə elektron xəbərdarlıq sisteminin formalaşdırılması da hədəf qoyulub. Həmçinin soyuq zəncir sisteminin inventarizasiyasının vahid elektron sistemi formalaşdırılması və təşkili nəzərdə tutulub. Bununla əlaqədar ÜST-lə əməkdaşlıq aparılır.
Ə.Cəfərov qeyd edib ki, 2022-ci ilin hədəflərini reallaşdırmaq üçün lazımi tədbirlər həyata keçirilir.
