Ümumdünya Səhiyyə Təşkilatının (ÜST) Avropa üzrə regional direktoru doktor Hans Henri P.Kluge Azərbaycanda rəsmi səfərdədir. Avropa immunlaşdırma həftəsinin keçirildiyi bir vaxtda COVID-19 pandemiyasından çıxarılan nəticələr əsasında keyfiyyətli səhiyyə islahatlarına əlçatanlığın artırılması və zəruri peyvəndlərin əhəmiyyətinin vurğulanması doktor Hans Klugenin Azərbaycana aprelin 26-27-də həyata keçirilən 2 günlük səfəri çərçivəsində müzakirə olunan məsələlərdən biridir.

“Pandemiya keyfiyyətli səhiyyə xidmətlərinin hər kəsə əlçatanlığının təmin edilməsinin vacibliyini bir daha təsdiq etdi. Bu istiqamətdə də Prezident Əliyevin dəstəyi ilə aparılan səhiyyənin maliyyələşdirilməsi islahatları nəticəsində Azərbaycanın atdığı konkret addımları görməkdən çox məmnunam”,- deyə doktor Hans Kluge qeyd edib.

O bildirib ki, 2022-ci il Avropa immunlaşdırma həftəsini Azərbaycanda keçirərkən mən tibb tələbələri ilə, yəni gələcəyin peyvəndlənmə kampaniyasının liderləri ilə söhbət etməyi və onlardan peyvəndləmə prosesində müşahidə etdikləri maneələri aradan qaldırmaq yolları üzrə təkliflərini öyrənməyi səbirsizliklə gözləyirəm: “İnanıram ki, bu, hər kəsin peyvəndlə qarşısı alına bilən xəstəliklərdən qorunması üçün mühüm əhəmiyyət kəsb edir. Belə ki, məhz yerli problemlərin həllini yerli üsullarla tapmaq istiqamətində əməkdaşlıq regiondakı bütün ölkələr tərəfindən imzalanan 2020-2025-ci illər üzrə “Daha Sağlam Həyat üçün Birgə Fəaliyyət” adlı Avropa İş Proqramının əsasını təşkil edir”.

Bu gün səfərin ilk günündə doktor Hans Klugeni Azərbaycan Respublikasının Prezidenti İlham Əliyev qəbul edib.

Azərbaycan Respublikasının Səhiyyə Nazirliyində yerli səhiyyə qurumları ilə əsasən 2030-cu il Avropa İmmunlaşdırma Gündəliyinə həsr edilmiş bir sıra görüşlər keçirilib. Doktor Hans Kluge səhiyyə naziri doktor Teymur Musayev, İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev, Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədr əvəzi Vüqar Qurbanov, Azərbaycan Tibb Universitetinin (ATU) rektoru Gəray Gəraybəyli və digər rəsmilərlə görüşüb.

Heydər Əliyev Fondunun ev sahibliyi ilə Heydər Əliyev Mərkəzində Ümumdünya Səhiyyə Təşkilatı, BMT və inkişaf tərəfdaşları ilə “ÜST-nin Azərbaycanda fəaliyyəti: gələcək əməkdaşlıq naminə fikir mübadiləsi” mövzusunda dəyirmi masa təşkil edilib. ÜST-nin Azərbaycanda 28 illik fəaliyyətini nümayiş etdirmək üçün eyni mövzuda fotosərgi təşkil olunub.

Səfərin ikinci günündə ÜST-nin regional direktoru Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB ilə birgə son iki il ərzində ÜST-nin Azərbaycandakı İlkin Səhiyyə Nümayiş Layihəsi ərazisi olan Şamaxı rayonuna səfər edəcək. Doktor Kluge Göylər kəndində Avropa immunlaşdırma həftəsi çərçivəsindəki ərazi fəaliyyətləri ilə tanış olacaq, tibb tələbələri və icma liderləri ilə görüşəcək və Şamaxı Təlim Mərkəzini ziyarət edəcək.

ÜST-nin regional direktorunun Azərbaycana səfəri günün ikinci yarısında Həbsxanalarda Vərəmin Profilaktikası və Nəzarəti üzrə ÜST ilə Əməkdaşlıq Mərkəzini ziyarətlə yekunlaşacaq.