İyunun 1-də Milli Xalça Muzeyində Uşaqların Beynəlxalq Müdafiəsi Günü münasibətilə “Uşaqların ürəkləri ilə çiçəklənən Şuşa” adlı festival keçirilib.
×
İyunun 1-də Milli Xalça Muzeyində Uşaqların Beynəlxalq Müdafiəsi Günü münasibətilə “Uşaqların ürəkləri ilə çiçəklənən Şuşa” adlı festival keçirilib.
AZƏRTAC xəbər verir ki, festivalda ayrı-ayrı musiqi və rəqs qruplarının, yaradıcı kollektivlərin bir-birindən maraqlı ifaları təqdim edilib. Daha sonra 47 nömrəli tam orta məktəbin şagirdlərinin iştirakı ilə hazırlanmış “Şuşa - Azərbaycanın mədəniyyət paytaxtı” və Xalça Muzeyinin Uşaq şöbəsi tərəfindən səhnələşdirilən “Arşın mal alan” tamaşaları, həmçinin “Uçan xalça” marionet teatr tamaşası nümayiş olunub.
Tədbirdə muzeyin Şuşa filialının məktəblilər arasında keçirdiyi “Şuşa qəhrəmanları” mövzusunda rəsm və inşa müsabiqəsi iştirakçılarının əl işləri sərgilənib, onların yazdıqları inşalar səsləndirilib. Eyni zamanda, Bakı Modern Təhsil Kompleksinin şagirdlərinin əl işlərindən ibarət “Qarabağın təsviri - art obyekt” adlı sərgi açılıb.
Rəngarəng proqramla davam edən festivalda uşaqlar üçün müxtəlif ustad dərsləri təqdim edilib.