Ümummilli Lider Heydər Əliyevin 100 illik yubileyi münasibətilə Mədəniyyət, Elm və Təhsil nazirliklərinin və Heydər Əliyev Mərkəzinin birgə təşkilatçılığı ilə keçirilən Uşaq İncəsənət Festivalının noyabrın 13-də bağlanış mərasimi keçirilib.

AZƏRTAC xəbər verir ki, əvvəlcə iştirakçılar sərgi və festival zamanı hazırlanmış əl işləri ilə tanış olublar.

Heydər Əliyev Mərkəzinin direktorunun birinci müavini Fərqan Novruzov çıxış edərək bildirib ki, festivala respublikanın bütün rayon və bölgələrindən iştirakçılar cəlb olunub. Qeyd edib ki, uşaqların diqqət və qayğı ilə əhatə olunması, onların mənəvi və fərdi inkişafı, maarifləndirilməsi və s. fəaliyyətlər Heydər Əliyev Mərkəzinin əsas prioritet istiqamətlərindəndir.

“Bu festival respublikamızda keçirilən ən mühüm layihələrdən biridir. Burada gənc dostlarımız, uşaqlar iştirak edir. Eyni zamanda, Heydər Əliyev Mərkəzini hər gün məktəblilər ziyarət edir. Onlar Heydər Əliyev irsinin, Azərbaycan tarixinin və mədəniyyətinin öyrənilməsi istiqamətində geniş məlumatlandırılırlar”, - deyə F.Novruzov diqqətə çatdırıb.

Mədəniyyət Nazirliyinin Aparat rəhbəri Xanlar Ağalarov bildirib ki, Uşaq İncəsənət Festivalı uşaqlarda mədəniyyətin ayrı-ayrı sahələrinə maraq oyatmaq, yaradıcı fəaliyyətlərinə dəstək məqsədi daşıyıb.

“Onu deyə bilərəm ki, qarşıya qoyulmuş məqsədə çata bildik. Çünki layihəmiz ölkədə, sözün əsl mənasında, mədəniyyət festivalına çevrildi. Xüsusi olaraq vurğulamaq istəyirəm ki, incəsənət festivalı uşaqlarla yanaşı, regionlar üzrə mədəni müəssisələrin də fəallıq göstərməsinə, təcrübə toplamasına təkan verib. Təsadüfi deyil ki, ümumilikdə festivala 2500-dən çox mütəxəssis münsif kimi öz töhfəsini verib", - deyə aparat rəhbəri diqqətə çatdırıb.

Elm və təhsil nazirinin müavini Həsən Həsənli və layihənin baş sponsoru “BP” şirkətinin Xəzər regionunda xarici əlaqələr və kommunikasiya üzrə vitse-prezidenti Bəxtiyar Aslanbəyli festival haqqında məlumat veriblər.

Bildirilib ki, bu qədər dövlət qurumunun və özəl partnyorların bir araya gəldiyi, uşaqların hərtərəfli inkişafına yönələn tədbirin keçirilməsi ölkəmizin həm mədəni həyatında, həm də təhsil sahəsində böyük əhəmiyyət daşıyır.

Daha sonra mükafatlandırma mərasimi keçirilib.

22 nominasiyada (18 fərdi, 4 kollektiv) üç yaş qrupu (6-9 yaş, 10-13 yaş və 14-17 yaş) üzrə keçirilən festivala respublikanın bütün rayon və şəhərlərindən ümumilikdə 27 minədək müraciətdən 408 qalib seçilərək mükafatlandırılıb.

Peşəkar və həvəskar kateqoriyaları üzrə təşkil olunan festivalın birinci mərhələsi aprel-iyun, II mərhələsi iyul-avqust aylarını əhatə edib.

Qeyd edək ki, festivalın final mərhələsi isə sentyabrın 1-dən 9-dək Bakıda altı mədəniyyət müəssisəsində – M.Maqomayev adına Azərbaycan Dövlət Akademik Filarmoniyası, Akademik Milli Dram Teatrı, Beynəlxalq Muğam Mərkəzi, Milli Xalça Muzeyi, Akademik Musiqili Teatr və Dövlət Uşaq Filarmoniyasında gerçəkləşib.

Festival çərçivəsində, həmçinin mayın 5-də Zəngilan rayonunun Ağalı kəndində tədbir təşkil olunub. İyulun 7-də Göygöl Milli Parkının ərazisində Gəncə-Daşkəsən RMİ-nin əhatə etdiyi Gəncə və Naftalan şəhərləri, Daşkəsən, Goranboy, Göygöl və Samux rayonlarından 6 nominasiya (xalq çalğı alətləri, rəssamlıq, bədii qiraət, xanəndəlik sənəti, aşıq sənəti, solo milli rəqs) üzrə ikinci mərhələyə vəsiqə qazanan 60 nəfər uşaq üçün yay düşərgəsi təşkil edilib.

Avqustun 26-27-də Laçın Şəhəri Günü tədbirləri çərçivəsində Həkəri çayının sahilində, bulvar ərazisində festivalın yay düşərgəsi keçirilib.