Noyabrın 3-də Avropa Atletika Assosiasiyasının dəstəyi ilə Olimpiya Mədəniyyəti və Təhsili Proqramı (OCEP) layihəsi çərçivəsində Azərbaycan Atletika Federasiyasının təşkilatçılığı ilə "Uşaq atletikası" yarışlarının final mərhələsi keçirilib.
×
Noyabrın 3-də Avropa Atletika Assosiasiyasının dəstəyi ilə Olimpiya Mədəniyyəti və Təhsili Proqramı (OCEP) layihəsi çərçivəsində Azərbaycan Atletika Federasiyasının təşkilatçılığı ilə "Uşaq atletikası" yarışlarının final mərhələsi keçirilib.
AZƏRTAC xəbər verir ki, yarışda hər məktəbdən dörd oğlan və dörd qız olaraq altı məktəbdən ümumilikdə 48 uşaq iştirak edib.
Finala vəsiqə qazanan 245, 193, 17, 83, 242, 56 saylı məktəblər olub.
Tədbirdə Milli Olimpiya Komitəsinin (MOK) vitse-prezidenti Çingiz Hüseynzadə dünya atletikasının xüsusi proqramı olan "Uşaq atletikası" proqramının artıq dəfələrlə həyata keçirildiyini qeyd edib. Bildirilib ki, Milli Olimpiya Komitəsinin OCEP Proqramında Azərbaycanın 50-yə yaxın məktəbi iştirak edir. Biz bu dəfə yarışı məhz məktəblilər arasında keçirməyi qərarlaşdırdıq. OCEP layihəsini əhatə edən məktəblərdən 18-i yarışa qatıldı. Üç gün keçirilən yarışda birinci, ikinci, üçüncü yeri tutan qalib komandalar bu gün final yarışında toplaşıblar. OCEP layihəsi MOK-nin brendi olan proqramdır. Hazırda bütün Avropada yayılır. İlk dəfə biz bu proqramı 2019-cu ildə Bakıda keçirilən Avropa Gənclər Festivalında nümayiş etdirdik. Məktəblərimiz festivalda fəal iştirak etdilər. Slovakiyada keçirilən növbəti Avropa Gənclər Festivalında bu proqram davam etdirildi və Azərbaycan məktəblilərinin nümayəndə heyəti də tədbirdə iştirak etdilər. Tədbirin yayılma dairəsi genişlənir. Beynəlxalq Atletika Federasiyası məhz uşaqların idmana, atletikaya cəlb olunması üçün böyük işlər görür və Azərbaycan da bu sahədə önəmli yerlərdən birini tutur.
Elm və Təhsil Nazirliyinin Məktəbdənkənar fəaliyyətin təşkili şöbəsinin İdman sektorunun müdiri Hilal Salmanov 2019-cu ildən OCEP layihəsinin Elm Təhsil Nazirliyinin və MOK-un birgə əməkdaşlığı çərçivəsində Bakıdakı məktəblərdə həyata keçirildiyini bildirib. O qeyd edib ki, bu layihədə Təhsil Nazirliyinin qarşısında qoyulan hədəflər olaraq bir çox meyarlar əksini tapır. Bu layihə məktəblər arasında onların fiziki sağlamlığının inkişaf etdirilməsi üçün xüsusi önəm daşıyır və mədəniyyətimizin, tariximizin beynəlxalq səviyyədə dünya ictimaiyyətinə məktəblilər tərəfindən çatdırılmasında platforma rolunu oynayır.
Yarışda birinci yeri 245 saylı məktəb, ikinci yeri 193 saylı məktəb, üçüncü yeri isə 242 saylı məktəb tutub.
Sonda qaliblər mükafatlandırılıblar.