Maliyyə Nazirliyində Ümummilli Lider Heydər Əliyevin anadan olmasının 100 illik yubileyi münasibətilə təşkil olunan silsilə tədbirlər çərçivəsində martın 28-də Cəfər Cabbarlı adına İrəvan Dövlət Azərbaycan Dram Teatrı tərəfindən “Qurtuluş” tamaşası nümayiş etdirilib.

AZƏRTAC xəbər verir ki, Heydər Əliyev ideyalarının daha dərindən öyrənilməsi və təbliği məqsədilə səhnələşdirilən tamaşada Ümummilli Liderin bədii obrazı canlandırılıb, onun həyatı və siyasi fəaliyyəti ilə bağlı maraqlı fraqmentlər əks etdirilib.

Prezident İlham Əliyevin Qarabağdakı Zəfər yürüşünü əks etdirən yaddaqalan epizodlarla yekunlaşan tamaşa nazirliyin kollektivi tərəfindən böyük maraqla qarşılanıb.

Qeyd edək ki, Maliyyə Nazirliyinin kollektivi tərəfindən “Heydər Əliyev İli” ilə bağlı Tədbirlər Planı çərçivəsində Ulu Öndər Heydər Əliyevin zəngin, çoxşaxəli irsinin təbliği və əziz xatirəsinin daim yaşadılması məqsədilə tədbirlərin il boyu həyata keçirilməsi nəzərdə tutulur.