Beynəlxalq Avrasiya Mətbuat Fondunun dəvəti ilə Əl-Cəzirə Media Şəbəkəsinin nümayəndə heyəti bir neçə gündür Azərbaycanda səfərdədir. Biz uzun illərdir birgə əməkdaşlıq edir və müştərək layihələr həyata keçiririk. Nümayəndə heyətinə Əl-Cəzirə Media Şəbəkəsinin İctimai Azadlıqlar və İnsan Hüquqları Mərkəzinin direktoru Sami Əl–Hacc rəhbərlik edir. Dünyanın aparıcı media şəbəkələrindən olan Əl-Cəzirənin nümayəndə heyətinin istəklərindən biri səfər çərçivəsində işğaldan azad olunmuş rayonlarda, eləcə də Azərbaycanın mədəniyyət paytaxtı, cənnətin bir guşəsi Şuşada olmaq idi. Artıq iki gündür Şuşadayıq və qonaqlar erməni vandallarının törətdikləri vəhşiliklərdən, barbarlıqdan heyrətləndiklərini gizlətmirlər.

Bu fikirləri AZƏRTAC-a açıqlamasında Beynəlxalq Avrasiya Mətbuat Fondunun (BAMF) prezidenti Umud Mirzəyev Şuşaya səfəri zamanı deyib.

Əl-Cəzirə Media Şəbəkəsinin əməkdaşlarının hər şeyi öz gözləri ilə görməsinin Azərbaycan həqiqətlərinin dünya ictimaiyyətinin diqqətinə çatdırılması baxımından çox əhəmiyyətli olduğunu bildirən BAMF-in prezidenti vurğulayıb: “Qonaqlarımız işğalçı Ermənistanın 30 ilə yaxın Azərbaycan torpaqlarında törətdikləri dağıntıları, vəhşilikləri öz gözləri ilə gördülər. Bu da keçmiş Qarabağ münaqişəsi ilə əsl həqiqətlərin dünya miqyasında təbliğ olunmasına təsirini göstərməyə bilməz”.

Əl-Cəzirə ilə birgə layihələrdən danışan Umud Mirzəyev deyib ki, Medianın İnkişaf Agentliyi və Beynəlxalq Münasibətlərin Təhlili Mərkəzinin dəstəyi ilə ADA universitetində kanalın əməkdaşları tərəfindən bir qrup jurnalistə təlimlər keçirilib. Avqustun 5-də Əl-Cəzirə Media Şəbəkəsi tərəfindən “Münaqişə zonasında jurnalistika” mövzusunda keçirilən təlimlər əsasında Azərbaycan media mənsublarına sertifikatlar təqdim olunub. Düşünürəm ki, bu təlimlər jurnalistlərimizin peşəkarlığının artırılması baxımından çox əhəmiyyətlidir. Bundan başqa, media şəbəkəsi tərəfindən ölkəmiz haqqında müxtəlif mövzularda reportajlar hazırlanır, sənədli filmin də çəkilməsi nəzərdə tutulur.

Umud Mirzəyev nümayəndə heyətinin Şuşadan qayıdarkən yolüstü Cəbrayıl və Füzuli rayonlarına baş çəkəcəyini bildirib. O deyib: "Dünyanın nəhəng media şəbəkələrindən olan Əl-Cəzirə kanalı 44 günlük Vətən müharibəsində Azərbaycanın haqq səsinin dünyaya çatdırılmasında prinsipial mövqe nümayiş etdirdi. Bu media şəbəkəsi operativ, düzgün və faktlar əsasında işləyir. Düşünürəm ki, media şəbəkəsi ilə bağlı birgə layihələrimiz və əməkdaşlığımız davam edəcək”.