Şuşa Azərbaycanın azərbaycançılıq rəmzidir. Azərbaycan üçün milli-mənəvi dəyər nöqteyi-nəzərindən nə axtarsan Şuşada taparsan.
×
Şuşa Azərbaycanın azərbaycançılıq rəmzidir. Azərbaycan üçün milli-mənəvi dəyər nöqteyi-nəzərindən nə axtarsan Şuşada taparsan. Bu şəhərin azad olunması mühüm bir ilə təsadüf etdi. Şuşanın əsası 1750-ci ildə qoyulmuşdu. 2020-ci ildə Şuşanın 270 illiyinə bundan böyük hədiyyə ola bilməzdi.
Bu sözləri AZƏRTAC-a müsahibəsində Azərbaycan Ümid Partiyasının sədri İqbal Ağazadə deyib.
Vətən müharibəsi zamanı müzəffər Ordumuzun, Azərbaycan xalqının, Ali Baş Komandanın - hər kəsin bu işdə bir millət, dövlət olaraq nə mümkün idisə, ortaya qoyduğunu söyləyən İqbal Ağazadə bildirib: “Prezident İlham Əliyev oktyabrın 19-da çıxışında Şuşasız bu iş yarımçıq qalar demişdi. Onda çoxlarımız üçün bu, bəlkə də bir xəyal idi. Müharibə başlayanda düşünürdük ki, heç olmasa bir rayonu işğaldan azad edib bu taleyi dəyişək. İndi burada hər cığır, hər daş, hər qapı, hər ev Azərbaycanın tarixindən, keçmişindən xəbər verir. Nə qədər istəsələr də, burada erməni şəhəri düzəldə bilməzdilər, necə ki, düzəldə bilmədilər. Diqqətlə fikir versəniz görərsiniz yeni heç nə yoxdur, tikib qura bilmədilər. Hətta olanı da dağıtdılar. Füzulini, Cəbrayılı, Ağdamı, Zəngilanı, Qubadlını darmadağın etdilər. Qəbul etmişdilər ki, burada yaşaya bilməzlər, heç adamları da yoxdur. Hər halda, hər kəs nəyin ona məxsus olduğunu çox gözəl bilir. Ermənilər də çox gözəl anladılar ki, Şuşa onlara məxsus deyil”.
İşğaldan sonra Şuşada olduğunu və babalarının yaşadığı Merdinli məhəlləsini ziyarət etdiyini bildirən partiya sədri qeyd edib: “Azərbaycan, bugünkü Azərbaycan insanı, əsgəri, birliyimiz ilə çox fəxr etdim. Düşünürəm ki, bu, bizim tariximizdə yeni bir mərhələnin başlanğıcı olacaq”.