Azərbaycan Kardiologiya Cəmiyyəti İctimai Birliyi nəzdində fəaliyyət göstərən İnvaziv İşçi Qrupunun III Azərbaycan İnvaziv Konqresinə yekun vurulub.

AZƏRTAC xəbər verir ki, konqresin sonuncu günündə müxtəlif mövzularda panel sessiyalar keçirilib.

Sessiyalar zamanı "Stenokardiya xəstələrinin müalicəsini necə sadələşdirmək olar?" mövzusunda çıxış edən Türkiyənin Mərmərə Universitetinin professoru Bülənt Mutlu bildirib ki, stenokardiya ürəyin işemik xəstəlikləri içərisində ən çox rast gəlinən növlərindən biridir. O, sinə nahiyəsində ağrı, sıxılma, ağırlıq və ya diskomfort yarada bilər, eyni zamanda, döş qəfəsi yaxınlığında, epiqastriumdan alt çənəyə, kürək sümükləri arasına və ya hər iki yuxarı ətrafdan bilək və barmaqlara qədər özünü göstərə bilər. Stenokardiya nəfəs darlığı ilə, sinə nahiyəsindəki diskomfort isə yorğunluq, huşunu itirmə, ürəkbulanma, yanma, narahatlıq və ölüm qorxusu kimi az rast gəlinən spesifik simptomlarla müşayiət oluna bilər. Adətən fiziki və ya emosional stres nəticəsində yaranır və ağır qida qəbulu ilə şiddətlənə bilir.

Qeyd edilib ki, Avropada ürəyin işemik xəstəliyindən təxmini illik ölüm sayı 1.2 milyona bərabərdir.

Stenokardiya xəstələrində koronar stenozun yayılması dərəcəsinin aşağı olduğu diqqətə çatdırılıb.

"Stenokardiya xəstələrinin 70 faizində ürək döyüntüləri hədəfinə çatmır və birinci dərəcəli müalicəyə baxmayaraq, simptomatik olaraq qalır.

Stenokardiya nəticəsində üçqat depressiya və təşviş, 60 faiz infarkt keçirmə, 50 faiz kardiovaskulyar ölüm riskləri meydana gəlir", - deyə B.Mutlu məruzəsi zamanı deyib.

"Kardioloq üçün kriptogen insult nə deməkdir?" mövzusunda çıxış edən Mərkəzi Neftçilər Xəstəxanasının kardioloqu Şahanə Ələsgərli

insultun 30 faiz böyük damar zədələnmələri, 25 faiz kriptogen insult, 20 faiz kardioemboliya, 15 faiz kiçik damar zədələnmələri, 10 faiz isə digər xəstəliklər mənşəli olduğunu diqqətə çatdırıb.

Kardioloq bildirib ki, ABŞ-da 800 minə yaxın illik yeni və ya təkrari insult qeydə alınır. Bunun da 87 faizi işemik, 13 faizi hemorragikdir. ABŞ-da ölüm halları arasında beşinci olan insult həmd də əlilliyin ən önəmli səbəblərindəndir. Kriptogen insult üçün isə potensial səbəblər gizli paroksizmal səyrici aritmiya, irsi trombofiliyalar, aorta qövsü ateroması, açıq oval dəlikdir.

Panel sessiyalar zamanı təqdimat və müzakirələrlə yanaşı, Azərbaycan, İsrail və Özbəkistan səhiyyə müəssisələrində icra edilən cərrahi əməliyyatlar canlı yayımlanıb.

Xatırladaq ki, konqresdə 9 ölkədən 73 məruzəçi iştirak edib. Türkiyə, Qırğızıstan, İsrail, Gürcüstan, Almaniya, Özbəkistan, Avstraliya və İrandan mütəxəssislər gəliblər. Tədbirdə dörd ölkədən - Azərbaycan, Türkiyə, İsrail və Özbəkistandan 5 mərkəzdən 8 canlı yayım edilib. Konqresin işi yutub kanalı üzərindən rus dilində Qırğızıstan, Qazaxıstan, Özbəkistan və Gürcüstana canlı yayımlanıb. Tədbir çərçivəsində xüsusilə gənc mütəxəssislər üçün koronar simulyasyon kursu da təşkil olunub.