Son illər Astara rayonunun bütün yaşayış məntəqələrində olduğu kimi, ucqar dağ kəndlərində də tikinti və abadlıq işləri geniş vüsət alıb.
×
Son illər Astara rayonunun bütün yaşayış məntəqələrində olduğu kimi, ucqar dağ kəndlərində də tikinti və abadlıq işləri geniş vüsət alıb. Deqədi-Pəlikəş avtomobil yolu asfaltlaşdırılandan sonra bir neçə məktəb binası və Pəlikəş kənd sahə xəstəxanası üçün yeni bina inşa edilib, elektrik xətlərində təmir işləri aparılıb. Hazırda Şəvqo kəndində modul tipli yeni məktəb binasının quraşdırılmasında son tamamlama işləri görülür.
AZƏRTAC-ın bölgə müxbiri xəbər verir ki, tarixən avtomobil yolu və elektrik xətti olmayan rayonun ucqar dağ kəndləri olan Diqo, Avyarud, Dolu, Sibiyyət kəndlərində bu sosial problemlərin aradan qaldırılması ilə əlaqədar Prezident İlham Əliyevin imzaladığı sərəncamların icrası artıq həllini tapıb. Hazırda sıldırım qayaların qoynunda, çətin relyefdə yerləşən bu kəndlərə avtomobil yolu və elektrik xəttinin çəkilişi başa çatmaq üzrədir.
Avtomobil yolları təkcə sadalanan kəndləri deyil, bu istiqamətdə yerləşən və heç vaxt yolu olmayan daha bir neçə dağ kəndini birləşdirir.
Burada olan gözəl təbiət mənzərələri insanı valeh edir. Diqo kəndinin yaxınlığından keçən çayın üstündə bir-birindən mənzərəli daha iki şəlalə insanların istirahət yerinə çevriləcək.