Ekologiya və Təbii Sərvətlər və Kənd Təsərrüfatı nazirliklərinin birgə təşkilatçılığı ilə tut tinglərinin paylanılması yarmarkası davam edir.

Ekologiya və Təbii Sərvətlər Nazirliyinin mətbuat xidmətindən AZƏRTAC-a bildiriblər ki, yarmarka dekabrın 4-ü, saat 13:00-da Qala qəsəbəsi, Mərdəkan prospekti, 89 ünvanında yerləşən “Azpetrol” yanacaqdoldurma məntəqəsinin qarşısında davam edəcək.

Qeyd edək ki, dekabrın 3-də Xırdalan şəhərində vətəndaşlara Abşeron yarımadasının iqliminə xarakterik tut tinglərinin paylanması yarmarkası keçirilib. Abşeron Dövlət Aqrar İnkişaf Mərkəzinin qarşısında təşkil olunan aksiya zamanı vətəndaşlara ETSN-in tinglik sahələrində yetişdirilən 1000-ə yaxın tut tingləri hədiyyə edilib, mütəxəssislər tərəfindən tinglərin əkilməsi və onlara qulluq göstərilməsi qaydalarına dair məlumatlar verilib.