Türkiyə Respublikası “ADEX-2022” Beynəlxalq Müdafiə Sərgisində ən çox şirkətlərlə təmsil olunan ölkələrdən biridir. Müdafiə sənayesində ən müasir və qabaqcıl texnologiyalardan geniş istifadə edən qardaş Türkiyə sərgidə 42 şirkət ilə təmsil olunub. Bunlardan biri olan “HAVELSAN” Hava Elektronik Sənaye və Ticarət Kurumsal şirkəti 1982-ci ildə Türkiyə Silahlı Qüvvələrinin Gücləndirilməsi Fondunun tərkibində yaradılıb. Xatırladaq ki, Prezident İlham Əliyev sentyabrın 6-da Bakı Ekspo Mərkəzində keçirilən “ADEX” sərgisində stendlərlə tanış olduğu zaman “HAVELSAN” şirkətinin nümayiş etdirdiyi hərbi məhsullara da baxıb.

Sərgidə iştirak edən “HAVELSAN” şirkətinin nümayəndəsi Murat Bal AZƏRTAC-a müsahibəsində qeyd edib ki, şirkət təkcə müdafiə, təhlükəsizlik və İT sahələrində texnologiyaları inkişaf etdirməklə kifayətlənmir, həm də özünün yüksək texnologiyalı proqram həllərini hazırlayır və simulyatorlar istehsal edir. Türkiyənin qabaqcıl texnoloji şirkətlərindən biri kimi tanınan “HAVELSAN” təcrübəsinə və ixtisaslaşmış əməkdaşlarına əsaslanaraq, ən müasir proqram təminatı tələb edən həllər hazırlayır. “HAVELSAN”, həmçinin yeni nəsil texnologiyalar, xüsusilə də süni intellektlə əlaqəli məhsullar, layihələr və sistemlər hazırlayır.

Bakı Ekspo Mərkəzində şirkət üz tanıma sistemi, sürücülər üçün təhlükəsizlik kəmərinin bağlanıb-bağlanmamasının aşkarlanması ilə bağlı məhsullarını təqdim edir. Şirkətin istehsal etdiyi məhsullarından biri Türkiyədə polis orqanlarında istifadə olunan video-idarəetmə və nəzarət sistemidir. Şirkətin avadanlıqları hava limanlarında, axtarışda olan şəxslərin tapılması üçün istifadə oluna bilər. Ümumiyyətlə, “HAVELSAN” müxtəlif sahələrdə fəaliyyət göstərir. Bunların sırasında dəniz, quru və hərbi-hava texnikası, o cümlədən təyyarələr üçün simulyatorların istehsalı yer alır. Həmçinin şirkət gəmilərin layihələndirilməsi və modernləşdirilməsi, idarəetmə sistemlərinin inkişafı üçün araşdırmalar aparır. İKT üzrə ofisləri isə şəhər təhlükəsizliyi, ağıllı şəhərlər, video-analitik və video-idarəetmə sistemləri kimi işləri həyata keçirir”.

Bakıya ikinci dəfə səfərə gəldiyini bildirən Murat Bal deyib: “Bakı çox gözəl şəhərdir. Özümü paytaxtınızda əcnəbi kimi hiss etmirəm. Burada olmaqdan çox məmnunam və öz məhsullarımızla həm Azərbaycanın dövlət qurumları, həm də təşkilatlarla və şirkətlərlə əməkdaşlıq və tərəfdaşlıq etmək, texnologiyalarımızı birlikdə inkişaf etdirmək istəyirik.

İki yüzdən çox şirkətin öz məhsullarını nümayiş etdirdiyi “ADEX-2022” sərgisinin Xəzəryanı ölkələr üçün əhəmiyyəti çox böyükdür. Bu əlaqələrin genişləndirilməsi üçün də vacib platformadır. Burada şirkətlər öz məmulatlarını təqdim edirlər. Bu sərgi gözəl təşəbbüsüdür, ona görə ki, sərgidə şirkətlər öz texnologiyalarını tanıdırlar və beynəlxalq əməkdaşlığı möhkəmləndirirlər. Beləliklə, mövcud çatışmazlıqları qarşılıqlı aradan qaldıraraq beynəlxalq müdafiə sənayesi sahəsini daha da inkişaf etdirə bilərik”.

Qeyd edək ki, şirkətin fəaliyyət sahələrinə təyyarə, aviasiya, gəmilər üçün radiolokasiya və naviqasiya sistemləri, sualtı qayıqlar, radioelektron vasitələr, kəşfiyyat kompleksləri, “bulud” və informasiya təhlükəsizliyi üçün həll variantları, optik-elektron avadanlıqlar, intellektual video-müşahidə cihazları, pilotsuz sistemlər, zirehli döyüş nəqliyyat vasitələri aiddir.

“HAVELSAN” təhlükəsizlik sistemləri çərçivəsində radarların və müxtəlif elektron sistemlərin quraşdırılmasını, müasirləşdirilməsini və modifikasiyasını təmin edir.