Azərbaycan Cüdo Federasiyasında (ACF) Dan dərəcələrinin verilməsinə həsr olunmuş seminar və imtahan təşkil olunub.
AZƏRTC xəbər verir ki, Türkiyə Cüdo Federasiyasının Təhsil Direktoru, Avropa Cüdo Birliyinin Kata Komissiyasının üzvü Mehmet Yılmaz tərəfindən aparılan seminarda 50 cüdo məşqçisi iştirak edir.
×
Azərbaycan Cüdo Federasiyasında (ACF) Dan dərəcələrinin verilməsinə həsr olunmuş seminar və imtahan təşkil olunub.
AZƏRTC xəbər verir ki, Türkiyə Cüdo Federasiyasının Təhsil Direktoru, Avropa Cüdo Birliyinin Kata Komissiyasının üzvü Mehmet Yılmaz tərəfindən aparılan seminarda 50 cüdo məşqçisi iştirak edir.
Seminar və imtahanı uğurla başa vurduqdan sonra iştirakçılara müvafiq Dan dərəcəsi üzrə bilik və bacarıqlarını təsdiq edən sertifikat veriləcək.
İlk dəfədir Azərbaycanda Dan dərəcələri üzrə seminar təşkil olunduğunu deyən M.Yılmaz daha əvvəl azyaşlı uşaqlar üçün kəmər sınaqlarının keçirildiyini bildirib: "Birinci Dan dərəcələri üzrə seminara qatılan məşqçilər Azərbaycan Cüdo Federasiyasının təşkil etdiyi kurslarda da iştirak edə biləcəklər. Bilirsiniz ki, Dünya Cüdo Federasiyası ilə ACF arasında bağlanan müqaviləyə əsasən, 60 cüdo məşqçisi xarici mütəxəssislərin kurslarında öz biliklərini artırırlar. Bu da onların beynəlxalq arenalarda işləməyinə kömək olacaq".
Türkiyəli mütəxəssis Azərbaycan Cüdo Federasiyasının Təlim-Məşq Mərkəzində yaradılan şəraitdən razı qaldığını söyləyib: "Üç gündür buradayıq. Məqsədimiz azərbaycanlı məşqçiləri yüksək səviyyədə öyrətməkdir. Çünki onlar bizdən öyrəndiklərini uşaqlara ötürəcəklər. Azərbaycanda yapon dilində olan cüdo terminləri yoxdur. Bunun üzərində də işləyəcəyik. Gələcəkdə Rüstəm Orucov, Orxan Səfərov kimi karyerası böyük olan idmançılar yetişəcəklər. Onların daha hazırlıqlı olmaları üçün bu cür seminarlar vacibdir. Proses uzun çəksə də, sonda nəticəsini görəcəyik".
Qeyd edək ki, Dan dərəcələrinin verilməsinə həsr olunmuş seminar və imtahan yanvarın 24-də başa çatacaq.