Dekabrın 30-da Beynəlxalq Türk Mədəniyyəti və İrsi Fondunda “Türk dünyası uşaqlarının həmrəyliyi” adlı tədbir keçirilib.

AZƏRTAC xəbər verir ki, tədbir 31 Dekabr - Dünya Azərbaycanlılarının Həmrəylik Günü və Yeni ilə həsr olunub. Tədbirin məqsədi müxtəlif türk ölkələrindən olan uşaqları bir araya gətirərək türk xalqlarının zəngin adət-ənənələrini, maddi mədəni irsini nümayiş etdirməkdir.

Beynəlxalq Türk Mədəniyyəti və İrsi Fondunun prezidenti Günay Əfəndiyeva bildirib ki, uşaqları bu məkanda görmək hamıya sevinc bəxş edir, çünki onlar türk dünyasının havasını özlərilə gətirirlər. Günay Əfəndiyeva uşaqları türk dünyası “ağacına” bənzədərək onun hər budağını bir türk dövləti adlandırıb.

Sabah Dünya Azərbaycanlılarının Həmrəyliyi Gününün qeyd olunacağını deyən Günay Əfəndiyeva bu bayramı bütün türk dünyasına şamil edib: “Çünki Qarabağ müharibəsində Türk dövlətlərinin göstərdiyi həmrəylik böyük zəfərə gətirib çıxarıb”.

O, həm də 2021-ci ilin dahi şəxsiyyətimizin ili olduğunu söyləyib. Bildirib ki, bu il Yunus Əmrənin, Əlişir Nəvainin və Nizami Gəncəvinin yubileyləri təntənəli şəkildə qeyd olunub.

Uşaqları Yeni il münasibətilə təbrik edən Günay Əfəndiyeva gələcəkdə onların tək ailədə deyil, bütün türk dünyasında bir-birinə dəstək olmalarını arzulayıb. Qeyd edib ki, XXI əsr bütün türk dünyasının çiçəklənən əsri olacaq.

Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, uşaqlar həyatın davamıdır, bizim ümidimiz, nicat və inkişafımızdır. Hər bir insan bu yolu keçir. İlk olaraq niyyət, arzu kimi dünyaya gəlir sonra şəxsiyyətə çevrilir və təmsil etdiyi xalqı üçün fayda verməyə başlayır.

Uşaqları torpağa səpilmiş bir toxuma bənzədən Bahar Muradova bildirib ki, o torpaq münbit olarsa ora əkilmiş gül, çiçək, ağac tez böyüyüb qol-budaq atacaq. “Bütün türk dünyasında, adına türk deyən bir insan varsa məsələyə məhz bu cür münasibət göstərir. Çünki bizim vahidliyimiz, birliyimiz məhz bir kökdən qidalanır. Bizim üçün ailə, uşaq və birgə gələcək çox vacib amildir. İnanıram ki, uşaqlar əzəmətli çinar ağacı kimi ətrafına kölgə salıb, bütün türk dünyasının dəyərlərini qoruyacaq”, - deyə Bahar Muradova bildirib.

Türkiyənin Azərbaycandakı səfiri Cahit Bağçı deyib: “Bu məkan tarixə, mədəniyyətə, ədəbiyyata ev sahibliyi edir. Beynəlxalq Türk Mədəniyyəti və İrsi Fondu sadəcə türk xalqlarının şəxsiyyətlərinin tanıdılmasını deyil, həm də onların adı ilə bağlı tədbirlərdə iştirak edir. Bu torpaqlar bizim ata torpaqlarımız olduğundan qardaşlığımızın mayası olan hər şeyi yeni nəsillərə ötürməli, Qazaxıstandan tutmuş Türkiyəyə qədər bütün türk dünyasının mədəniyyətini, tarixini, dahi şəxsiyyətlərini qorumalıyıq. Bu mənada müxtəlif türk ölkələrindən olan uşaqları burada görmək ayrı bir gözəllikdir”.

Səfir çıxışının sonunda Türkiyə-Azərbaycan qardaşlığının daha da güclənərək inkişaf edəcəyini vurğulayıb.

Tədbir çərçivəsində Təhsil Nazirliyi 3 nömrəli Uşaq Gənclər İnkişaf Mərkəzinin “Çiçəyim” uşaq teatrı və “Azəri inciləri” rəqs kollektivinin təqdimatında nağıl qəhrəmanlarının obrazları canlandırılıb, türk ölkələrinin milli rəqsləri nümayiş olunub.

Tədbirdə Azərbaycan, Türkiyə, Türkmənistan, Qazaxıstan, və Qırğızıstanı təmsil edən uşaqlar təmsil etdikləri dövlətlərə məxsus şeir və mahnılar səsləndiriblər.