Elm və Təhsil Nazirliyinin Torpaqşünaslıq və Aqrokimya İnstitutunun laboratoriyalarında ölkəmizdə əkin strukturunun təkmilləşdirilməsi, torpaqların ekoloji qiymətləndirilməsi, suvarma sistemlərinin və torpaqların vəziyyətinin öyrənilməsi, drenaj və kollektor sularının kimyəvi analizlərinin aparılması istiqamətində elmi-tədqiqat işləri aparılır.
×
Elm və Təhsil Nazirliyinin Torpaqşünaslıq və Aqrokimya İnstitutunun laboratoriyalarında ölkəmizdə əkin strukturunun təkmilləşdirilməsi, torpaqların ekoloji qiymətləndirilməsi, suvarma sistemlərinin və torpaqların vəziyyətinin öyrənilməsi, drenaj və kollektor sularının kimyəvi analizlərinin aparılması istiqamətində elmi-tədqiqat işləri aparılır. İnstitutun Torpaq-aqrokimyəvi tədqiqatlar və kütləvi analizlər laboratoriyası mineral gübrələr laboratoriyasının bazasında AMEA Rəyasət Heyətinin qərarı ilə 2012–ci ilin dekabr ayında yaradılıb. Nazirlər Kabinetinin qərarı ilə 2016-cı ildə Suvarma və Eroziya İnstitutunda olan Torpaq, bitki və su analizləri laboratoriyası Torpaq-aqrokimyəvi tədqiqatlar və kütləvi analizlər laboratoriyasına birləşdirilib.
Laboratoriyanın rəhbəri aqrar elmlər üzrə fəlsəfə doktoru, dosent Mirvari Məmmədova AZƏRTAC-a müsahibəsində bildirib ki, burada institutun tematik mövzu proqramları, mühüm dövlət proqramlarından irəli gələn elmi-tədqiqat işləri yerinə yetirilir. Hazırda laboratoriyada çalışan 16 əməkdaş təbii və mədəni senozlarda torpaqların aqrokimyəvi və fiziki-kimyəvi xüsusiyyətlərinin müasir metodlarla tədqiqi ilə məşğul olur. Bundan əlavə, laboratoriya müxtəlif səbəblərdən eroziyaya uğramış və münbitliyini itirmiş torpaqların istehsal dövriyyəsinə qaytarılması üçün bərpa üsullarının seçilməsi üzərində işləyir. Laboratoriyada, həmçinin gübrələrin səmərəli istifadəsi üzrə tədqiqatlar aparılır.