Üç ildir ki, Ümumdünya Səhiyyə Təşkilatı (ÜST) dünyada səhiyyə sisteminin təkmilləşdirilməsi barədə həyəcan təbili çalırdı.
×
Üç ildir ki, Ümumdünya Səhiyyə Təşkilatı (ÜST) dünyada səhiyyə sisteminin təkmilləşdirilməsi barədə həyəcan təbili çalırdı. COVID-19 pandemiyası hər bir ölkəyə müəyyən dərslər verdi.
AZƏRTAC xəbər verir ki, bunu IX Qlobal Bakı Forumu çərçivəsində “Qlobal səhiyyənin idarə edilməsi” mövzusunda keçirilən panel iclasında çıxış edən səhiyyə naziri Teymur Musayev deyib.
Ölkəmizdə pandemiya ilə mübarizədən danışan T.Musayev Prezident İlham Əliyevin rəhbərliyi ilə həyata keçirilən bütün tədbirlərin ÜST-lə əlaqəli şəkildə icra edildiyini deyib.
“Təəssüf ki, bu dövrdə təkcə pandemiya ilə deyil, antivaksin hərəkatına qarşı da mübarizə apardıq. Bir sıra kütləvi informasiya vasitələrində vaksinlərlə bağlı əhalini qorxuya salan saxta məlumatlar yayıldı. Medianın elmi təsdiqi olmayan məlumatları yaymaq hüququ yoxdur. Çünki nəticədə antivaksin hərəkatı ilə üzləşdik. Azərbaycan hökuməti isə media ilə paralel işləyərək koronavirus, vaksinlər barədə vaxtaşırı dolğun, düzgün məlumatları ictimaiyyətə çatdırdı. Vətəndaşların dövlətə güvənməsi səhiyyə sistemlərinin düzgün təşkilində vacib amildir. Ümumiyyətlə, əhalinin savadlılığı olmalıdır ki, pandemiyanın nəticələri düzgün anlaşılsın”.
Nazirin sözlərinə görə, pandemiya bizə öyrətdi ki, səhiyyə sisteminə düzgün investisiyaların yatırılmasının vaxtı gəlib çatıb: “Pandemiya böhrandır, böhranlar olmadan tərəqqiyə nail olmaq mümkün deyil. Bu, bizi müəyyən addımlar atmağa sövq etdi və çoxtərəfli əməkdaşlığın vacibliyini öyrətdi”.