Martın 9-da Yaponiyanın Azərbaycandakı səfirliyi ilə benefisiar təşkilat qismində çıxış edən Beynəlxalq Avrasiya Mətbuat Fondu (BAMF) arasında “Tərtər rayonunun minadan təmizlənməsi üçün təchizatların təmin edilməsi” layihəsi üzrə qrant müqaviləsi imzalanıb.

AZƏRTAC xəbər verir ki, imzalama mərasimində Azərbaycan Respublikasının Minatəmizləmə Agentliyinin (ANAMA) Beynəlxalq Əlaqələr və donorlar departamentinin direktoru Nicat Kərimov və departamentin əməkdaşı Gülər Mustafa da iştirak ediblər.

Bu layihənin əsas məqsədi ANAMA-nın tapşırığı ilə fəaliyyət göstərən BAMF-ın İcma Mina Aksiyası komandasının Tərtər rayonunda mövcud olan mina və partlamamış sursatların təmizlənməsində istifadə üçün 11 ədəd mina detektoru, 11ədəd qoruyucu geyim dəsti və Yaponiyanın “Mitsubişi” şirkətinin istehsalı olan 1 ədəd pikapla təmin etməklə, Azərbaycanda həyata keçirilən mina və partlamamış sursatların təmizlənmə fəaliyyətinin tezləşdirilməsi və Tərtər rayonunda daha təhlükəsiz şəraitin təmin olunmasıdır. Layihədə nəzərdə tutulan ləvazimatların alınması üçün Yaponiya səfirliyi tərəfindən 88,224 ABŞ dolları (təxminən 149,098 AZN) məbləğində yardım ediləcək.

Beynəlxalq Avrasiya Mətbuat Fondu Azərbaycan ərazisində 20 ildən artıqdır ki, mina və partlamamış sursatların təmizlənməsi fəaliyyətini həyata keçirir. Bu gün imzalanmış layihə 2001-ci ildə icra olunmuş “Minatəmizləmə komanda heyətinə minatəmizləmə ilə bağlı təlimin həyata keçirilməsi” və 2004-cü ildə icra olunmuş “Tərtər rayonunun minadan təmizlənməsi” layihələrindən sonra Yaponiya səfirliyi tərəfindən “Ot Kökləri və İnsan Təhlükəsizliyi” üzrə Qrant Yardımı Proqramı çərçivəsində Avrasiya Mətbuat Fondu ilə imzalanan 3-cü yardım layihəsidir.

Bu gün imzalanmış müqavilə də daxil olmaqla Azərbaycanda “Ot Kökləri və İnsan Təhlükəsizliyi” üzrə Qrant Yardım Proqramı çərçivəsində indiyədək 278 qrant müqaviləsi imzalanıb və bu müqavilələrin ümumi qrant məbləği 23,450,000 ABŞ dolları (təxminən 39,860,000 AZN) keçir.

“Ot kökləri və İnsan Təhlükəsizliyi” üzrə Qrant Yardımı Proqramı İnsan Təhlükəsizliyi ideyasını rəhbər tutaraq, əhalinin sosial rifahının yaxşılaşdırılması məqsədi ilə, bilavasitə yerli əhalinin bəhrələnəcəyi nisbətən kiçikmiqyaslı layihələrin həyata keçirilməsi üçün nəzərdə tutulan iqtisadi yardım proqramıdır.