Son məlumata görə, il ərzində yeni növ koronavirus pandemiyası səbəbindən 62 məktəb distant təhsilə keçirilib. Hazırda onlardan təxminən 10 məktəb distantdır. Demək olar ki, əksər məktəblər ənənəvi təhsilə qayıdıb.

AZƏRTAC xəbər verir ki, bunu UNEC İqtisadi Forumu çərçivəsində jurnalistlərə müsahibəsində təhsil naziri Emin Əmrullayev söyləyib.

Nazir qeyd edib ki, hazırda koronavirusa görə daha az sayda sinif və daha az sayda məktəb bağlanır. Çünki bu xəstəliyə yoluxanların sayı azalır. Yoluxmanın azalmasının səbəbi vaksinasiya prosesinin yüksək səviyyədə olması ilə əlaqədardır. Məktəblərdə müəllimlərin 90 faizdən çoxunun vaksinasiyaya cəlb olunması nəticəsində təhsilin davamlılığını saxlaya bilirik.