Təbrizin “Traktor” klubu futbol üzrə İran kubokunun sahibi olub.

AZƏRTAC xəbər verir ki, Təbriz təmsilçisi Tehrandakı “Azadi” stadionunda keçirilən final matçında “İstiqlal” ilə qarşılaşıb. Təbrizlilər Tehran klubuna 3:2 hesabı ilə qalib gələrək kuboku qazanıblar.

“Traktor” tarixində ikinci dəfədir ölkə kubokunu qazanır. Birinci dəfə 2014-cü ildə bu uğura imza atan “Traktor” 1976-cı, 1994-cü və 2017-ci ildə finalçı olub.

Qeyd edək ki, “Traktor” kuboku qazanmaqla 2020-2021-ci il mövsümündə Asiya Çempionlar Liqasının birbaşa qrup mərhələsindən mübarizəyə başlayacaq.