Martın 6-da Azərbaycan Teatr Xadimləri İttifaqında “Gənc rejissorların yaradıcılıq laboratoriyası”nın “Baxış-2” teatr festivalının açılışı olub.

AZƏRTAC xəbər verir ki, Teatr Xadimləri İttifaqının sədri, Xalq artisti Azər Paşa Nemətov çıxış edərək festival haqqında məlumat verib və əhəmiyyətini vurğulayıb.

İttifaqın laboratoriyaları barədə danışan qurumun rəhbəri qeyd edib ki, martın 9-dək davam edəcək festivalda “Gənc rejissorların yaradıcılıq laboratoriyası”nın beş və İttifaqın digər laboratoriyalarının qonaq qismində üç tamaşası oynanılacaq.

Səhnə əsərləri Azərbaycan Teatr Xadimləri İttifaqının Mustafa Mərdanov adına səhnəsində nümayiş ediləcək. Bildirilib ki, martın 10-da isə festival çərçivəsində nümayiş edilən tamaşaların mükafatlandırma mərasimi təşkil olunacaq. “Gənc rejissorların yaradıcılıq laboratoriyası”nın bədii rəhbəri Azərbaycan və Kalmıkiya respublikalarının Əməkdar incəsənət xadimi Bəhram Osmanovdur.

Sonra Benkrt Alforsun “İllüziyaçılar” əsəri əsasında səhnələşdirilən eyniadlı tamaşası nümayiş edilib. Tərcüməsi Zümrüd Quliyevaya məxsus əsərə Müşfiq Əliyev quruluş verib. Tamaşada rolları Kərəm Hadızadə, Zümrüd Quliyeva və Əməkdar artist Elnur Hüseynov canlandırıblar.