Oktyabrın 21-də Milli Azərbaycan Tarixi Muzeyinin və Xantı-Mansiysk Muxtar Dairəsi – Yuqranın büdcə təşkilatı Geologiya, Neft və Qaz Muzeyinin (Rusiya Federasiyası) birgə layihəsi çərçivəsində məşhur azərbaycanlı geoloq, geologiya-mineralogiya elmləri doktoru, Rusiya Elmlər Akademiyasının müxbir üzvü, Sosialist Əməyi Qəhrəmanı Fərman Salmanova həsr olunan “Azərbaycanlı Prometey - Fərman Salmanov. Sibir neftinin kəşfi” adlı fotosərginin açılışı olub.

AZƏRTAC xəbər verir ki, sərgidə Qərbi Sibirin Tümen vilayətində nəhəng neft və qaz yataqlarını kəşf etmiş görkəmli alimin həyat və fəaliyyətini əks etdirən 55 unikal foto nümayiş olunur.

Tədbiri giriş sözü ilə açan akademik Nailə Vəlixanlı sərginin əhəmiyyətini vurgulayıb. Akademik məşhur azərbaycanlı alim Fərman Salmanovun həyat yolundan və neft kəşfiyyatı sahəsində xidmətlərindən bəhs edib.

AMEA-nın vitse-prezidenti akademik İbrahim Quliyev, Neft və Qaz İnstitutunun baş direktoru akademik Fəxrəddin Qədirov və professor Tofiq Məlikli Fərman Salmanovla bağlı xatirələrini bölüşüblər.

AMEA-nın A.Bakıxanov adına Tarix İnstitutunun elmi işlər üzrə direktor müavini Cəbi Bəhramov Azərbaycan neftinin tarixi əhəmiyyəti və rolu barədə danışıb.

Azərbaycan Dövlət Neft və Sənaye Universitetində (ADNSU) fəaliyyət göstərən Fərman Salmanov adına SOCAR-ADNSU Elm və Tədris Mərkəzi haqqında məlumat verən dosent Ata Babayev qeyd edib ki, universitetin ən yüksək göstəriciləri olan tələbələrinə “Fərman Salmanov adına təqaüd” təqdim olunur.

Qeyd olunub ki, bütün həyatını neft və qaz yataqlarının işlənməsinə həsr edən Fərman Salmanovun adı dünya neft tarixinə Tümenin zəngin təbii sərvətlərinin ilk kəşfiyyatçılarından biri kimi daxil olub. O, heç bir neft ehtiyatının olmadığı iddia edilən Qərbi Sibirdə 1961-ci ildə ilk neft yataqlarını üzə çıxarıb. Fərman Salmanovun rəhbərliyi altında karbohidrogen ehtiyatları ilə zəngin yüzdən artıq irihəcmli yataq kəşf edilərək istismara verilib. Məhz həmin yataqların işlənilməsi sayəsində keçmiş Sovetlər İttifaqı dünyanın ən çox neft və qaz ixrac edən ölkələri sırasına çıxmışdı.

Tədbirdə “100 ilin adamları" layihəsi çərçivəsində “Geoloq Fərman Salmanov” adlı film nümayiş olunub.

Sonda tədbir iştirakçıları fotosərgini ziyarət ediblər