“Əhalinin sosial cəhətdən həssas qruplarının sahibkarlıq fəaliyyətinə həvəsləndirilməsi: reallıqlar və perspektivlər” mövzusunda keçirilən seminar kimi tədbirlər TÜRKPA-ya üzv ölkələr arasında münasibətlərin daha də dərinləşdirilməsi, Azərbaycanın təcrübəsinin öyrənilməsi və uğurların inkişaf etdirilməsi baxımından çox əhəmiyyətlidir.

Dövlətimiz həssas qrupdan olan insanların sahibkarlıqla məşğul olmaları və öz işlərini qurmaları üçün müvafiq şəraiti təmin edir.

AZƏRTAC xəbər verir ki, bu fikirləri Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili aprelin 21-də TÜRKPA-nın "Əhalinin sosial cəhətdən həssas qruplarının sahibkarlıq fəaliyyətinə həvəsləndirilməsi: reallıqlar və perspektivlər” mövzusunda keçirilən seminarda deyib.

Komitə sədri diqqətə çatdırıb ki, məqsədimiz sosial sahibkarlığın inkişaf etdirilməsidir.

Tahir Mirkişili deyib: “Ünvanlı sosial yardım üçün 47 min ailəyə 158 milyon vəsait ödənilib.

Özünüməşğulluq məsələsi diqqətdə saxlanılır və bu il 16 mindən çox insana istehsal vasitələri təmin edilib. Məqsəd sahibkarlığın təşviq edilməsidir.

Sahibkarlıqla məşğul olanlar 10 il müddətinə vergidən azad edilib”.

Onun sözlərinə görə, məşğulluq strategiyası çərçivəsində 2 milyondan çox iş yeri açılıb ki, onun 70 faizi özəl sektoru əhatə edir. Hər il əmək bazarına 100 minə yaxın işçi daxil olur.