Aprelin 25-də Bakı Biznes Universitetində Ümummilli Lider Heydər Əliyevin anadan olmasının 102-ci ildönümünə həsr olunmuş “Suverenliyin möhkəmləndirilməsində rəqabətqabiliyyətli iqtisadiyyatın inkişafına yeni strateji yanaşmalar” mövzusunda beynəlxalq elmi-praktik konfrans keçirilib.

AZƏRTAC xəbər verir ki, Bakı Biznes Universitetinin rektoru, iqtisad elmləri doktoru professor İbad Abbasov konfransın mövzusunun aktuallığını vurğulayıb və hər bir ölkənin suverenliyinin möhkəmləndirilməsinin və dövlət müstəqilliyinin inkişafının onun iqtisadi gücü ilə birbaşa bağlı olduğunu bildirib. Rektor diqqətə çatdırıb ki, bu kontekstdə Ulu Öndər Heydər Əliyevin məşhur kəlamı xüsusi əhəmiyyət daşıyır: “İqtisadiyyatı güclü olan dövlət hər şeyə qadirdir”. Bu fikir iqtisadiyyatın həyatın bazisi, siyasətin isə onu idarə edən üstqurum olduğunu bir daha təsdiqləyir.

Professor İbad Abbasov qeyd edib ki, məhz bu yanaşmaya uyğun olaraq Prezident İlham Əliyev 2025-ci il 11 fevral tarixli Sərəncamla 2025-ci ili “Konstitusiya və Suverenlik İli” elan edib. Bu qərar hüquqi və iqtisadi baxımdan Azərbaycan dövlətçiliyinin möhkəmləndirilməsinə yönəlmiş mühüm strateji addımdır və ölkədə rəqabətqabiliyyətli iqtisadiyyatın inkişafı üçün yeni imkanlar açır. Bu baxımdan Bakı Biznes Universiteti bir ali təhsil müəssisəsi olaraq suverenliyin möhkəmləndirilməsi istiqamətində töhfə vermək məqsədilə sözügedən mövzuda beynəlxalq elmi-praktik konfrans təşkil etməyi özünə mənəvi borc bilib. Konfransın plenar iclasında Milli Məclisin deputatı, Azərbaycan İqtisadçılar İttifaqının sədri akademik Ziyad Səmədzadə “Azərbaycanda real sektorun rəqabət mühiti və onun qanunvericilik bazasının təkmilləşdirilməsi” mövzusunda məruzə ilə çıxış edib. Daha sonra İqtisadiyyat İnstitutunun direktoru, iqtisad elmləri doktoru, professor Nazim Müzəffərli ölkə və müəssisələrin rəqabət qabiliyyəti ilə bağlı analitik baxışlarını təqdim edib.

Konfransda çıxış edən Milli Məclisin Aqrar siyasət komitəsinin sədri Tahir Rzayev suverenliyin möhkəmləndirilməsi baxımından rəqabətqabiliyyətli iqtisadiyyatın inkişafına yönəlmiş yeni strateji yanaşmaların müzakirəsinin, innovativ həllərin təhlilinin və dayanıqlı iqtisadi modelin formalaşdırılmasının vacibliyini vurğulayıb. Azərbaycan Dövlət İqtisad Universitetinin Maliyyə və audit kafedrasının müdiri, iqtisad elmləri doktoru, professor Əvəz Ələkbərov isə çıxışında rəqabətqabiliyyətli iqtisadi inkişafın təmin olunmasında süni intellekt texnologiyalarının mühüm rol oynadığını qeyd edib. Natiqlər çıxışlarında vurğulayıblar ki, Azərbaycan iqtisadiyyatının rəqabətqabiliyyətliliyinin artırılması və davamlı inkişafının təmin edilməsi dövlətin gələcəyi, xalqın rifahı, eləcə də ölkənin hüquqi, siyasi və iqtisadi müstəqilliyinin daha da möhkəmləndirilməsi baxımından mühüm əhəmiyyət daşıyır.

Konfrans çərçivəsində xarici ölkələrdən də tanınmış alimlər iştirak ediblər. Türkiyənin Kadır Has Universitetindən professor Özgür Orhanqazi, Polşanın Bıdqoş İqtisad Universitetindən prorektor Maqdalena Berqman, Estoniyanın Tallin Texnologiya Universitetindən Arçil Koçia, Macarıstanın Kənd Təsərrüfatı və Həyat Elmləri Universitetindən İstvan Temesi, Litvanın Utenos Tətbiqi Elmlər Universitetindən Ruta Meiste, Birləşmiş Ərəb Əmirliklərinin Qulf Universitetindən dosent Sabrin Ali Azim, Rumıniyanın Babeş-Bolyai Universitetindən Trayan İonut Luka və Moldovanın İqtisadi Araşdırmalar Akademiyasından dosent Tatiana Qutium iqtisadi rəqabətqabiliyyətlilik, süni intellektin tətbiqi, yaşıl idarəetmə və dayanıqlı inkişaf mövzularında çıxış edərək öz ölkələrinin qabaqcıl təcrübələrini bölüşüblər.

Plenar iclasdan sonra konfrans bölmə iclasları ilə davam etdirilib. Bu sessiyalarda iştirakçılar müxtəlif sahələrdə rəqabət qabiliyyətinin artırılması yolları, innovasiya, rəqəmsallaşma və dayanıqlı inkişafın təmin olunması üzrə yeni iqtisadi modellər ətrafında geniş elmi-praktik fikir mübadiləsi aparıblar.