Sumqayıt Şəhər Polis İdarəsinin əməkdaşları koronavirus pandemiyası ilə mübarizədə əhalinin sağlamlığının qorunması məqsədilə elan olunan xüsusi karantin rejiminin pozulması hallarının qarşısının alınması məqsədilə müvafiq tədbirləri fasiləsiz davam etdirirlər.

Daxili İşlər Nazirliyinin mətbuat xidmətindən AZƏRTAC-a bildiriblər ki, polis əməkdaşları xüsusi karantin rejimi ilə əlaqədar şəhər ərazisində həm profilaktiki, həm də reyd xarakterli tədbirlər həyata keçirirlər. Sakinlərin daha sıx toplaşdıqları, hərəkətin intensiv olduğu ərazilərdə maarifləndirici söhbətlər aparılır, sanitar rejimin tələbləri izah edilir, sosial məsafənin qorunması və tibbi maskalardan istifadənin zəruriliyi vətəndaşların diqqətinə çatdırılır.

Şəhər polis idarəsinin əməkdaşları təqaüd və sosial müavinətlərin verilməsi ilə bağlı bankların qarşılarında yarana biləcək sıxlığı nəzərə alaraq həmin ərazilərə xüsusi nəzarət edir, sosial məsafənin qorunması üçün lazımi tədbirləri yerinə yetirirlər. Həmin ərazilərdə sakinlərin rahatlığını təmin etmək məqsədilə idarə əməkdaşları tərəfindən sosial məsafə gözlənilməklə stullar düzülür, hava şəraiti ilə əlaqədar mütəmadi olaraq növbə gözləyən sakinlərə içməli sular verilib.

Bununla yanaşı, xəbərdarlıqlara riayət etməyən və karantin rejiminin tələblərini pozmaqda davam edən vətəndaşlar barədə qanunamüvafiq tədbirlər görülüb. Onlardan doqquz şəxs barədə məhkəmənin qərarı ilə inzibati həbs seçilib.