İtaliyanın şimalında yerləşən və “kanallar şəhəri” kimi tanınan Venesiya dünyanın ən gözəl və romantik şəhərlərindən sayılır. Şəhər yüzlərlə ada üzərində qurulub və həmin adalar körpülərlə bir-birinə bağlanır. Burada əsas nəqliyyat vasitələri qayıqlar və qondolalardır.

Venesiya qədim zamanların sirlərini hələ də divarlarında yaşadır. Onun küçələrini dolaşanlara mənəvi sakitlik bəxş edən hər cür şərait var. Sevgi axtaranlar da, sakitlikdən zövq alanlar da, uzaq keçmişə səyahət etmək istəyənlər də yolunu bu şəhərdən salır.

Kanallar boyu uzanan köhnə binalar sanki əsrlərin yorğunluğundan xəbər verir. Suyun üzərində yavaş hərəkət edən vaporetto, qondola və qayıqlar şəhərin həyat ritmini müəyyən edir. Qüruba doğru gedən Günəşin şəfəqləri qədim binaların divarlarına yayılaraq şəhərin romantik ab-havasını daha da yüksəldir. Azadlığın, dəniz eşqinin və əyilməz iradənin rəmzi olan qağayılar xoş bir ovqat yaradır. Dar keçidlərin doluluğu şəhərin hər addımda canlı və enerjili atmosferə malik olduğunu göstərir. Körpülərin üzərindən adlayıb keçən sakinlər müxtəlif hekayələrin qəhrəmanlarına bənzəyirlər.

Şəhərdə küçələrin yerini kanallar tutur. Sakinlər və turistlər bir yerdən başqa yerə gondola və ya su avtobusları ilə gedirlər. Axşamlar kanallar boyu qayıqla gəzinti unudulmaz hisslər yaşadır.

Venesiya sevginin su və daş üzərində əbədi həkk olunmuş hekayəsi, qədimliyin və səssiz gözəlliyin bir araya gəldiyi nadir məkanlardan biridir.

AZƏRTAC-ın fotoqrafının unikal tarixi şəhərin əsrarəngiz mənzərələrindən lentə aldığı epizodları təqdim edirik.