2018-ci ildə Müharibə və şəhid ailələrinə 626 ədəd, 2019-cu ildə 934 ədəd, 2020-ci ildə isə 1572 mənzil və fərdi ev verilib. Ötən il mənzillə təminat proqramı 3 il əvvələ nisbətən beş dəfə genişləndirilərək 3 minədək mənzilin verilməsi proqramı icra olunub. Ümumilikdə isə indiyədək 12100-dən çox şəhid ailəsi və müharibə əlilinə nazirlik tərəfindən mənzil və fərdi ev təqdim edilib. Mənzillə təmin edilənlərdən 83 nəfəri Vətən Müharibəsi Qəhrəmanı, eləcə də şəhid olmuş Vətən Müharibəsi Qəhrəmanının ailə üzvləridir.

Bununla yanaşı, ötən il 271 Çernobıl əlili, 203 dövlət uşaq müəssisələrinin məzunu, 275 nəfər isə gözdən əlilliyi olan şəxs mənzillərlə təmin olunub.

Keçən il 144 Vətən müharibəsi əlili minik avtomobili ilə təmin edilib, 20 minik avtomobili isə aidiyyəti üzrə təqdim edilməsi üçün Naxçıvan Muxtar Respublikasına təhvil verilib. 2021-ci ildə 164, ümumilikdə isə ötən dövrdə 7400 avtomobil qeyd olunan kateqoriyadan olan vətəndaşlara təqdim edilib.

AZƏRTAC xəbər verir ki, bu barədə Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İdarə Heyətinin sədri Vüqar Behbudovun ötən ilin yekunları və bu il qarşıda duran hədəflərə həsr olunan mətbuat konfransında deyib.

Onun verdiyi məlumata görə, ötən il şəhid ailələri, Vətən müharibəsi əlilləri, əlilliyi olan digər şəxslər və sağlamlıq imkanları məhdud uşaqlar da daxil olmaqla 4455 nəfər yollayışla təmin olunaraq sanatoriya-kurort və müalicə mərkəzlərinə göndərilib. Onlardan 179 nəfəri şəhid ailəsi üzvləridir.

Səyyar sosial reabilitasiya xidmətləri barədə bəhs edən agentliyin İdarə Heyətinin sədri deyib: “2021-ci ilin iyun-dekabr ayları ərzində Bakı şəhəri üzrə 0-6 yaş arasında olan ümumilikdə 158 nəfər sağlamlıq imkanları məhdud uşaqla ilkin qiymətləndirmə aparılıb, onlardan 118 nəfər uşaq səyyar sosial reabilitasiyaya cəlb olunub. Sosial reabilitasiyaya cəlb olunan uşaqlardan 108 nəfərlə pedaqoji, 97 nəfərlə loqopedik, 64 nəfər uşaq və onun ailəsi ilə psixoloji iş aparılıb. Reabilitasiyaya cəlb olunan uşaqlardan 29-u paytaxtın Səbail və Yasamal rayonlarında, 42-si Binəqədi və Nərimanov rayonlarında, 28-i Nizami, Sabunçu və Suraxanı rayonlarında, 6-sı Xəzər və Pirallahı rayonlarında, 10-u Nəsimi və Xətai, 3-ü isə Qaradağ rayonunda yaşayır”.

Mətbuat konfransında bildirilib ki, İraq və Suriyadan ölkəmizə repatriasiya olunan vətəndaşlarımız lazımi sosial dəstək tədbirləri ilə əhatə olunurlar. Ümumilikdə 2018-ci ildən indiyə qədər 358 Azərbaycan vətəndaşının vətənə repatriasiyası həyata keçirilib. Onlardan 340 nəfəri uşaq, 18 nəfəri isə analardır. Keçən il 81 nəfər Azərbaycan vətəndaşı həmin ölkələrdən repatriasiya olunub və onlardan 49 nəfər agentliyin tabeliyində olan sosial xidmət müəssisəsinə yerləşdirilib.

Qeyd edilib ki, repatriant uşaqların və qəyyum ailələrə sosial dəstək göstərilməsi üçün 3 sosial işçidən ibarət səyyar qrup yaradılıb və onlar Bakı və ətraf qəsəbələrdə, Sumqayıt və Abşeronda yaşayan 87 ailədən 79-na səfərlər təşkil edib. Hazırda həmin şəxslərin və onların ailə üzvlərinin zəruri sosial xidmətlərlə təmin edilməsi üçün tədbirlər davam etdirilir.