Ermənistan silahlı qüvvələrinin 12-16 iyul tarixlərində həyata keçirdikləri hərbi təxribat - mövqelərimizi intensiv atəşə tutması nəticəsində mülki əhaliyə, dövlət əmlakına, o cümlədən infrastruktur obyektlərinə ciddi ziyan dəyib. Ən ağrılısı isə açılmış artilleriya atəşi nəticəsində biri general-mayor, biri polkovnik olmaqla 12 hərbi qulluqçu və bir nəfər mülki şəxs həlak olub. Əlbəttə ki, mülki əhalini ağır silahlardan atəşə tutmaq erməni faşizminin əyani nümunəsidir. Mən 2016-cı ildən ATƏT PA-da, 2018-ci ildən isə AŞPA-da Azərbaycan nümayəndə heyətinin üzvü olmuşam. Hazırda da ATƏT PA-da Azərbaycan nümayəndə heyətinin üzvüyəm. Bütün bu müddət ərzində artıq neçə illərdir ki, nümayəndə heyətində təmsil olunan həmkarlarım və mən bir millət vəkili olaraq iştirak etdiyimiz bütün iclaslarda, beynəlxalq konfranslarda, Ermənistanın Azərbaycana qarşı yürütdüyü təcavüzkar siyasət, öz dədə-baba torpaqlarından didərgin düşərək qaçqın, köçkün həyatı yaşamağa məhkum olmuş soydaşlarımızın tapdanan hüquqlarından danışırıq. Dünya ictimaiyyətini məlumatlandırmağa çalışsaq da, Ermənistan tərəfi öz çirkin və aqressiv siyasətini yürütməkdədir.

Bu fikirləri AZƏRTAC-a Milli Məclisin deputatı Ülviyyə Ağayeva bildirib.

Deputat deyib: “2019-cu ilin aprel ayında Ermənistanın baş naziri Nikol Paşinyan AŞPA-nın plenar iclaslarından birinə dəvət olunmuşdu. Həmin iclasda mən ona sual verdim: "2001-ci ildə Avropa Şurasına üzv qismində qəbul olunduqdan sonra Ermənistan hələ də davam etməkdə olan Dağlıq Qarabağ münaqişəsinin sülh yolu ilə həlli yoluna sadiq olduğunu bildirib. Avropa Şurasının Parlament Assambleyasının tribunasından öz ölkənizin üzərinə götürdüyü öhdəliyi hansı səbəblərə əsaslanaraq bu günədək həyata keçirmədiyini və bunun daha nə qədər davam edəcəyini bizə deyə bilərsinizmi?".

Siyasi cəhətdən əsaslandırılmış heç bir fikir dilə gətirməyən erməni baş nazir həmişəki kimi mövzunu başqa istiqamətə yönəltdi və arqumentlərə əsaslanmayan fikirlər irəli sürərək, ona ünvanlandırılan sualda öz əksini tapmış heç bir məqamı cavablandırmadı. Paşinyan bir daha Dağlıq Qarabağın üçüncü tərəf qismində danışıqlar prosesinə qoşulmasının və Ermənistanla Azərbaycan arasında ictimai dialoqun zəruri olduğunu qeyd edib. Bununla bağlı qeyd etmək lazımdır ki, danışıqlar prosesinin müstəqil tərəfi qismində separatçı Dağlıq Qarabağ rejiminin iştirak etməyə heç bir hüququnun olmaması hər kəsə, o cümlədən Paşinyanın özünə də çox gözəl məlumdur. Rəsmi Bakı bir neçə dəfə ictimai dialoq təşəbbüsü irəli sürsə də, məhz Ermənistanın qeyri-konstruktiv və reallıqla heç bir əlaqəsi olmayan mövqeyinin nəticəsi olaraq bu vacib addımı həyata keçirmək hələ də mümkün olmayıb.

Bundan əlavə, Paşinyan öz cavabında, həmçinin keçən il 29 mart tarixində Avstriyanın paytaxtı Vyana şəhərində Azərbaycan Respublikasının Prezidenti İlham Əliyevlə baş tutmuş görüşü yüksək qiymətləndirdiyini və görüşün konstruktiv mühitdə keçdiyini də qeyd etmişdi. Ermənistanın baş nazirinin cavabı hər zaman üstünlük verdiyi populist ritorikasından o qədər də uzaq olmadı. Bu gün onların mövqeyi göz qabağındadır.

İyulun 20-də Prezident İlham Əliyev mülki əhaliyə, dövlət əmlakına, o cümlədən infrastruktur obyektlərinə dəymiş ziyanın aradan qaldırılması ilə bağlı tədbirlər haqqında Sərəncam imzalayıb. Prezident İlham Əliyevin Sərəncamı bir daha onu göstərdi ki, Azərbaycan tərəfi mülki əhalinin və iqtisadi infrastrukturun bərpa olunmasını diqqətdə saxlayır, həyata keçirilməli olan bərpa-quruculuq işləri müəyyənləşdirilərək sakinlərin öz normal həyatlarına dönüşü üçün bütün lazımi addımları atır. Hazırda dünyada koronavirus pandemiyasının geniş yayılmasına baxmayaraq, əhalinin sağlamlığının qorunması, rifahının yaxşılaşdırılması Prezidentin əsas prioritetlərindən biridir.

2016-cı ildə də Aprel döyüşləri zamanı dövlətimizin başçısı əhaliyə dəyən ziyanın aradan qaldırılması, evlərin bərpası və yenidən qurulması ilə bağlı dərhal öz tapşırıqlarını vermişdi.

Onu da qeyd etmək istərdim ki, Prezident İlham Əliyevin dağıdılmış infrastrukturun bərpası ilə bağlı dərhal verdiyi Sərəncam bir daha onu göstərir ki torpaqlarımızı düşmən işğalından azad edəcəyimiz zaman həmin ərazilərdəki infrastruktur Prezidentin diqqəti, qayğısı və göstərişləri əsasında sürətlə bərpa olunacaq və Azərbaycan xalqının sərəncamına veriləcək.

Baş verən hadisələr bir daha onu göstərdi ki, Ali Baş Komandan İlham Əliyevin rəhbərliyi ilə xalqla ordunun mənəvi birliyi təmin edilib. Könüllü olaraq cəbhə bölgəsinə getmək istəyənlər bir daha ölkəmizdə vətənpərvərlik ruhunun yüksək olduğunu isbat etdilər. Şübhəsiz ki, Ermənistan hökumətinin məlum təxribatı daxildə üzləşdiyi siyasi böhranla əlaqədardır. Ermənistan hökuməti bu kimi təxribatlarla beynəlxalq ictimaiyyətin və narazı olan əhalisinin fikrini yayındırmağa çalışır.

Sonda biz beynəlxalq ictimaiyyəti, ATƏT-ə üzv olan bütün ölkələri erməni tərəfinin Azərbaycan ərazisinə qarşı güc tətbiqinin dayandırılmasına və onların beynəlxalq hüququn prinsiplərinə əsaslanaraq münaqişənin həll olunması üzrə konstruktiv danışıqlara cəlb olunmalarında bütün lazımi tədbirləri və səylərini əsirgəməməyə çağırırıq”.