Müasir İncəsənət Muzeyində rəssam Soltan Soltanlının rəngkarlıq və qrafika əsərlərindən ibarət “Anlam” adlı fərdi sərgisi açılıb.

AZƏRTAC xəbər verir ki, sərgidə rəssamın son illərdə yaratdığı 55 rəngkarlıq, 15 qrafik əsəri nümayiş olunur.

Soltan Soltanlı AZƏRTAC-a müsahibəsində sərgi barədə danışıb: “Fikrimcə, rəsm əsəri tamaşaçı ilə danışmalı, özünü ona izhar etməli, tablo ilə seyirçi arasında hansısa anlaşılmazlıq qalmamalıdır. Ona görə bu gün sərgidə görəcəyiniz əsərlərimi mümkün olduqca danışdırmışam, ən dərin anlamları onlara yükləmişəm, düşüncə və duyğularımı tamaşaçılara sadə yolla çatdırmağa çalışmışam".

Fırça ustası sənəti insan həyatına yön verən, yol göstərən amil kimi gördüyünü deyir. “Düşünürəm ki, tamaşaçı sənətin aydınladan və təmizləyən gücü ilə mənəvi dincliyə, rahatlığa qovuşa bilər. Bunun üçün müasir incəsənətin üzərinə böyük işlər düşür. Fikrimcə, müasir incəsənət tamaşaçılarda asanlıqla tez ərsəyə gələn, istəyən hər kəsin çətinlik çəkmədən yarada biləcəyi bir rəssamlıq sahəsi təəssüratı formalaşdırmamalıdır. Bunun üçün müasir incəsənət öz varlığını, taleyini anlatmalı, düşüncəyə bağlamalıdır", - deyə rəssam bildirib.

Müsahibimizin sözlərinə görə, o, kətan üzərində yeni həyat, hadisə yaratmağa çalışıb: "Sərgidəki əsərlərin hansı üsluba aid olduğu qonaqları maraqlandıracaq - sürrealizm, primitivizm və s. Mən əvvəllər özümü bu cərəyanların hansısa birinə aid edirdim. Sonra gördüm ki, hansısa cərəyana aid olmaq, onlarla məhdudlaşmaq deməkdir. Əslində mən "anlam"a aidəm. Bu isə mənə hər hansı cərəyanla məhdudlaşmamaq imkanı verir. Sərgidəki əsərlər bir dəyər altında birləşir. Həmin dəyərin adı "anlam"dır. Tamaşaçı sərgidən çıxandan sonra öz ilə həmin dəyəri aparacaq".

Soltan Soltanlı nə çəkirsə-çəksin, hökmən hər bir əsərdə anlam ifadə edir. Rəssam mövzularını həyatın içindən çıxarır, hadisələrə dərin anlam verir və onları tamaşaçıya qeyri-adi şəkildə təqdim edir.

Sərgidəki əsərlər “Qadın”, “At”, “Xəyali mənzərələr” və “Qarışıq” mövzuları üzrə tamaşaçılara təqdim olunur.

Qeyd edək ki, Soltan Soltanlı 1997-ci ildən bir sıra ölkələrin beynəlxalq yarışma, festival və sərgilərində Azərbaycanı təmsil edir. Əsərləri dünyanın 50-dən çox ölkəsində muzey və şəxsi kolleksiyalarda qorunur.

Çoxlu beynəlxalq mükafatlara layiq görülən rəssam yüzlərlə sərgidə iştirak edib, əsərləri yüzlərlə kataloqda nəşr olunub.

O, təsviri sənətin rəngkarlıq, qrafika və karikatura sahələri ilə məşğul olur.

Sərgi dekabrın 2-dək davam edəcək.