On bir radioda apardığımız monitorinqin nəticələrinə əsasən kifayət qədər qüsurlar qeydə alınıb. Dilin bütün səviyyə və normalarında bu qüsurlar hiss olunur.
×
On bir radioda apardığımız monitorinqin nəticələrinə əsasən kifayət qədər qüsurlar qeydə alınıb. Dilin bütün səviyyə və normalarında bu qüsurlar hiss olunur. Məqsədimiz ən ciddi təbliğat vasitəsi olan radioda aparıcıların Azərbaycan dilinin orfoepiya normalarına əməl etməsi və bu qüsurların aradan qaldırılması üçün tədbirlər görülməsidir. Həmçinin Azərbaycan dilinin saflığının qorunması və düzgün tətbiqi məsələlərini həyata keçirməkdir.
AZƏRTAC xəbər verir ki, bunu jurnalistlərə müsahibəsində Monitorinq Mərkəzinin direktoru professor Sevinc Əliyeva söyləyib. O bildirib ki, televiziyadan fərqli olaraq radioda vizual görüntü olmadığına görə burada aparıcı daha çox məsuliyyət daşıyır. Çünki o, dinləyiciyə həm verilişin məzmununu, həm də Azərbaycan dilinin zənginliyindən istifadə edərək nəzərdə tutduğu məsələləri doğru şəkildə çatdırmalıdır. Eyni zamanda, milli-mənəvi dəyərləri nəzərə alaraq verilişini düzgün qurmalıdır. Burada, ilk növbədə, məsuliyyət aparıcıların üzərinə ona görə düşür ki, onlar Azərbaycan dilinin təbliğatçılarıdır.
S.Əliyeva qeyd edib ki, radio aparıcıları üçün təlimlər keçirilməsi nəzərdə tutulur. Məqsəd radio mütəxəssislərinin nitqində Azərbaycan dilinin orfoepiya normalarına riayət olunması, dilimizin düzgün tələffüzünü həyata keçirmək məsələsidir.