Azərbaycan Həmkarlar İttifaqı Konfederasiyası hər il bayramlarda, əlamətdar günlərdə respublikamızın rayonlarında yaşayan, xüsusi qayğıya ehtiyacı olan və aztəminatlı ailələrə kömək göstərir. Bu dəfə də respublikamızın 76 rayonunda yaşayan 4065 ailəyə Novruz bayramı münasibətilə bayram sovqatı göndərdik.

Bunu AZƏRTAC-a açıqlamasında Azərbaycan Həmkar İttifaqları Konfederasiyasının sədri, Milli Məclisin deputatı Səttar Möhbalıyev bildirib.

AHİK sədri vurğulayıb ki, əhalinin rifah halının yaxşılaşdırılması, həssas təbəqədən olan insanlara diqqət və qayğının göstərilməsi Prezident İlham Əliyevin və Birinci vitse-prezident Mehriban xanım Əliyevanın böyük önəm verdiyi məsələlərdəndir. Dövlətimiz tərəfindən bayramlarda və əlamətdar günlərdə aztəminatlı, şəhid, qazi və digər həssas qruplardan olan ailələrə hədiyyə, sovqat və yardımların paylanması artıq ənənə halını alıb. Azərbaycan Həmkarlar İttifaqları Konfederasiyası (AHİK) da belə sosial tədbirlərdə yaxından iştirak edir və dəstəyini əsirgəmir.

2020-ci ildən indiyədək Konfederasiya tərəfindən 30 min vətəndaşa maddi yardımın göstərildiyini diqqətə çatdıran Səttar Möhbalıyev bildirib ki, bu yardımlar təkcə AHİK tərəfindən deyil, həm də ölkə üzrə 26 sahə həmkarlar ittifaqları tərəfindən edilir. Qeyd olunub ki, AHİK Vətənin dar günündə, yəni, 44 günlük Vətən müharibəsində üzərinə düşən vəzifələri layiqincə yerinə yetirib, öz dəstəyini əsirgəməyib. Pandemiya dövründən indiyədək ümumilikdə xərclənən 25 milyondan çox vəsaitin 2 milyona yaxını (1 milyon 800 min) Silahlı Qüvvələrə Yardım Fonduna köçürülüb. Bundan başqa, Qarabağ Dirçəliş Fonduna, “YAŞAT” Fonduna da yardımlar edilib.

Bildirilib ki, Vətən müharibəsində canından keçən şəhidlərin ailələrinin, qazilərin problemlərinin diqqətdə saxlanılması hər birimizin vətəndaşlıq borcudur. 150-dən çox şəhid ailəsinin AHİK tərəfindən himayəyə götürüldüyünü deyən Səttar Möhbalıyev diqqətə çatdırıb ki, bu ailələrin 300 övladına 18 yaşına çatanadək qayğı göstəriləcək. “AHİK tərəfindən hər ay bu uşaqlara maddi yardım göstərilir. Biz müraciət əsasında şəhid ailələrinin evlərinin təmir olunmasına da kömək göstəririk”, - deyə o qeyd edib.

Vətəndaşların sağlamlığının dövlətimizin daim diqqət mərkəzində olduğunu bildirən AHİK sədri qeyd edib ki, hər il ümumilikdə 100 min vətəndaşın istirahət mərkəzlərində, sanatoriyalarda ödənişsiz və güzəştli şərtlərlə istirahəti təmin olunur.

S.Möhbalıyev vurğulayıb ki, hazırda dövlətimizin qarşısında duran əsas vəzifə işğaldan azad edilən ərazilərin bərpa edilməsidir. Bu istiqamətdə çox böyük işlər görülür, nəhəng layihələr reallaşdırılır. Həmin ərazilərdə AHİK-in nəzdində olan sahələrin bərpasına da öz töhfəmizi vermək fikrindəyik və artıq bunun üçün vəsaitin toplanmasına başlanılıb.